Әбей ҡыҙын аҡсаһынан яҙҙырған

Өфөлә 78 йәшлек пенсионер ҡатын ҡыҙының аҡсаһын "махсус хеҙмәт хеҙмәткәре"нә тапшырған. Был турала Башҡортостан Республикаһы буйынса Эске эштәр министрлығының матбуғат хеҙмәте яҙҙы.

Яҡынса мәғлүмәттәр буйынса, ғариза биреүсенең кеҫә телефонына ике шылтыратыу килә. Посылка алыу һылтауы менән улар уның смс-хәбәрҙән раҫлау кодын ала, һуңынан был код уның иҫәп яҙмаһына инеү өсөн ҡулланыла.

Артабан ялған "Роскомнадзор", "Росфинмониторинг" һәм "Федераль именлек хеҙмәте"нән белгестәр шылтырата. Улар хәбәр итеүенсә, бирелгән код уның "Дәүләт хеҙмәттәре" порталындағы аккаунтына инеү мөмкинлеген аса. "Росфинмониторинг"тың "белгесе" ялған ышаныс ҡағыҙы күрһәтә һәм видеоэлемтә аша бәйләнештә булыр өсөн телефонына ҡушымта урынлаштырырға мәжбүр итә. Әңгәмә барышында әбей үҙенең банктағы аҡсалары һәм ҡыҙының сит ил валютаһы булыуы тураһында хәбәр итә.

Артабан ҡатын менән "хәүефһеҙлек хеҙмәте хеҙмәткәре" бәйләнешкә инә, ул "алдаҡсыларға" ҡаршы енәйәт эше ҡуҙғатылыуы тураһында хәбәр итә һәм ярҙам итергә вәғәҙәләй. Көн дауамында муттар, "тентеүгә тиклем "декларация төҙөү" һылтауы менән, йәнәһе лә, "енәйәтселәрҙең" эшмәкәрлеген туҡтатыу өсөн", пенсионерҙы бөтә аҡсаны курьерға тапшырыу өсөн әҙерләргә кәрәклегенә ышандыра.

Видеоэлемтә аша өҙлөкһөҙ күҙәтеү аҫтында зыян күреүсе "тикшереүселәр"ҙең күрһәтмәһе буйынса аҡсаны пакетҡа һала. Уға курьер менән осрашыу өсөн пароль тәғәйенләнә. Әбей курьерға 1,5 миллион һумдан ашыу сумманы тапшыра, ә уныһы пенсионерға ялған "Үҙәк банк"тың документын тоттора. Бынан һуң әбейгә "Федераль именлек хеҙмәткәре" шылтыратып, иҫәптәрҙең уңышлы "блокка ҡуйылыуы" тураһында хәбәр итә.

Элекке тормош иптәше менән һөйләшкәндән һуң ғына әбей үҙенең мутлашыусыларҙың ҡорбаны булыуын аңлай һәм полицияға мөрәжәғәт итергә була.

Башҡортостан Республикаһы буйынса Эске эштәр министрлығы иҫкәртә: уяу булығыҙ. Әгәр һеҙгә законһыҙ операция тураһында шикле шылтыратыу килһә, әңгәмәне туҡтатырға кәңәш ителә. Аҡсаларығыҙҙы хәүефһеҙ иҫәпкә күсермәгеҙ, телефон аша таныш булмаған кешеләргә шәхси мәғлүмәттәрҙе бирмәгеҙ.

Ҡыҙ баланың әсәһен яҡларға маташыуы тураһында яҙҙыҡ: https://ye102.ru/articles/ya-yly-tar-ta-ma-y-netu/2026-01-20/s-en-a-lar-a-matash-an-bala-4544224

Ә был яҙма 62 йәшлек ҡатындың муттарҙы байытыуы тураһында: https://ye102.ru/articles/ya-yly-tar-ta-ma-y-netu/2026-01-20/fsb-nan-shyltyratam-4544221

Фото: асыҡ сығанаҡтарҙан.