Бойоҡма һин

Бойоҡма һин яңғыҙ ҡалдым тиеп,
Һуңланым тип, йәшлек яҙына,
Кемдер берәү була – һине уйлар,
Кемдер берәү һине һағына...

Бәлә килһә, елдән хәбәр ебәр,
Күңел ҡапҡаларың асылыр -
Кемдер берәү һиңә бәхет теләр,
Кемдер берәү һиңә ашығыр.

Шатлығыңа йыһан тар сағыңда
Йондоҙҙарға тарат йыр итеп -
Кемдер берәү күккә текләп илар,
Кемдер йырлап күңел йыуатыр.

Моңаймасы берүк, донъя көләс,
Һин йылмайһаң, ул да мөләйем.
Йылдар аша килеп етә алмай,
Кемдер һиңә илтә йөрәген...
Һиңә генә...

Лилиә Һаҡмар

Юлай Кәримов фотоһы