Дин әһелдәре өсөн “Күпер” проекты башланды

«Күпер» тип аталған курс Мәрйәм Солтанова исемендәге Ислам колледжы менән «Ватанды һаҡлаусылар» фондының Башҡортостан филиалының махсус хәрби операцияла ҡатнашыусыларға һәм уларҙың ғаилә ағзаларына рухи, социаль һәм психологик ярҙам проекты менән берлектә ойошторолған.

«Ватанды һаҡлаусылар» фондының республика филиалы белгестәре, республика клиник психотерапия үҙәгенең клиник психологтары, ораторлыҡ оҫталығы, асыҡ сығыштар буйынса белгестәр, юристар дин әһелдәре өсөн лекцион һәм практик дәрестәр үткәрәсәк. Уҡыуҙар тамамланғас, алдағы йылдың февралендә проектта ҡатнашыусыларҙың барыһы ла уҡыу тураһында сертификат аласаҡ.

Курстарҙы асыу тантанаһында «Ватанды һаҡлаусылар» махсус хәрби операцияла ҡатнашыусыларға ярҙам итеү дәүләт фонды филиалы етәксеһе Гөлнур Ҡолһарина, Мәрйәм Солтанова исемендәге Ислам колледжы директоры Йәмил Хәлирахманов, Башҡортостан Республикаһы Башлығы ҡарамағындағы дәүләт-конфессия мөнәсәбәттәре буйынса Совет кәңәшсеһе Руслан Ҡарамышев сәләмләне.

Гөлнур Ҡолһарина йыйылыусыларҙы «Ватанды һаҡлаусылар» фонды филиалы эшмәкәрлегенең төп йүнәлештәре менән таныштырҙы. Фонд филиалында күрһәтелгән психологик ярҙам тураһында филиал етәксеһе урынбаҫары Светлана Елпаева һөйләне. Республика клиник психотерапия үҙәгенең клиник психологтары ла сығыш яһаны.

Ойоштороусылар дини эшмәкәрҙәр араһында махсус хәрби операция яугирҙары һәм уларҙың ғаиләләре осраған проблемалар тураһында хәбәрҙарлыҡ кимәлен күтәреү, шулай уҡ кәрәкле рухи һәм психологияға  ярҙамын күрһәтеү күнекмәләрен яҡшыртыу маҡсатын ҡуя.

– Муниципалитеттарҙа рухиниҙар йәмәғәтселек фекере лидерҙары булып тора, яугирҙарҙы ерләүҙә ҡатнаша, уларға ярҙам һорап килгән геройҙарҙың туғандары менән аралаша. Ир-егеттәр медицина психологына бик теләп бармай, беҙҙең холҡобоҙ ҙа шулай. Ә беҙҙең хәҙрәттәргә бындай ҡатмарлы категория менән аралашыу өсөн махсус белем кәрәк. Уҡыған ваҡытта беҙ яугирҙар һәм уларҙың яҡындары менән эшләү өсөн бөтә психологик, хоҡуҡи, социаль аспекттарҙы үҙ эсенә аласаҡбыҙ. Күнекмәләр һәм психология буйынса оҫталыҡ дәрестәре генә түгел, теоретик һәм практик дәрестәр, күсмә зона саралары ла үткәреләсәк. Ораторлыҡ оҫталығы, халыҡ алдында сығыш яһау күнекмәләре, имидж буйынса блок эшләргә ниәтләйбеҙ. Бөтә белем ислам контексына яраҡлаштырыласаҡ, - тип билдәләне Гөлнур Ҡолһарина.

– Был курстар махсус хәрби операцияла ҡатнашыусылар һәм уларҙың ғаиләләре өсөн ярҙам системаһын булдырыу юлында мөһим аҙым буласаҡ. Алған белемдәр белгестәребеҙгә һөҙөмтәле эшләргә һәм мохтаждарға ярҙам күрһәтергә ярҙам итер, тип ышанабыҙ, –  тип һыҙыҡ өҫтөнә алды Мәрйәм Солтанова исемендәге Ислам колледжы директоры Йәмил Камил улы.

Проект Башҡортостан Республикаһы Башлығы Гранттары Фондынан ярҙам алды.

"МАХ"тағы беҙҙең каналға тоташ! Ссылкаһы бына!