Улар сафтан сыҡҡан техникаға йән өрә

Ремонт ротаһы – техниканы биш бармағы кеүек белгән, механик, токарь, электрик, иретеп йәбештереүсе кеүек һөнәр эйәләрен берләштергән оҫталар подразделениеһы. Алғы һыҙыҡта булмаһалар ҙа, һуғыш үткән урындан ҡыйралған хәрби машиналарҙы ялан шарттарындағы автосервистарына алып ҡайтып, ҡыҫҡа ваҡытта уларҙы йүнәтеп, сафҡа баҫтыралар. Сөнки хәрби нығытмаларҙа торған яугирҙың хәрби техникаһы юҡ икән, ул – ике ҡулһыҙ һалдат. «Урал», «КАМАЗ»дар, бронетранспортер, еңел автомобилдәр снаряд тейеүҙән, шартлауҙан зыян күреп бында килтерелә.

Беҙ 31-се «Башҡортостан» мотоуҡсылар полкының ре­монт ротаһына барғанда ла эш ҡайнай ине. Егеттәрҙең бе­рәүһе «Урал»ға дрондарҙан һаҡлаусы сетка беркетә, икенселәр станокта нимәлер игәй, өсөнсөләр дви­гатель һүтә. Хәрбиҙәргә эш етерлек, рота урынлашҡан урынды дрон хә­үефенән һаҡларға ла, ерҙе ҡаҙып, машиналарҙы һаҡлаусы урын эшләргә лә, һаҡланыу селтәре ҡуйып палатка ҡорорға ла кәрәк. Сөнки дошман спутник һәм дрондар аша уларҙы кү­ҙәтеп  тора. Бында тәүлек әйләнәһенә эш тынмай. Кәрәк икән, егеттәр, ғүмерен хәүеф аҫтына ҡуйып, яу яла­нына сығып та маши­на­ларҙы йүнәтеп ҡайта. Ремонт рота­һыныҡылар йәйен-ҡышын асыҡ һауала, ҡар, ям­ғырҙа эшләп торған мас­тер­скойға тиҙ яраҡ­лашҡан. Ав­то­мобиль нин­дәй генә хәлдә булмаһын, ул бер аҙнала ре­монтланырға һәм фронтҡа ебә­релергә тейеш. Бындағы хәрби механиктар хәҙер, күҙ­ҙәрен йомдорһалар ҙа, авто­мо­билде һүтеп йыя ала, эш күләме ҙур булғас, оҫтарып бөт­кәндәр. Әле 31-се “Башҡор­тос­тан” мо­тоуҡ­сылар полкы­ның ремонт р­отаһына йү­нә­тергә ике ав­то­мобиль һәм ике пулемет кил­терелгән.
Ремонт бокстарының бере­һен­дә тимерҙе иретеп йә­бештереү менән булышҡан “Ҡасим” по­зывнойлы яугир менән әңгә­мәләшәбеҙ. Ул – Баймаҡ райо­нының Ҡолсора ауылынан, бында 2023 йылдан хеҙмәт итә. РФ Оборона ми­нистрлығы менән контракт төҙөгәнсе Себерҙә электрогазо­сварщик булып вахта ысулы менән эшләп йөрөгән. Рем­ро­тала ул йәше буйынса де­мо­билизацияланған “Бабай” по­зывнойлы яугирҙы алмаш­тыр­ған.
– Тимер эше ауыр, әлбиттә. Һәр килтерелгән автомобилгә һаҡлаусы сеткаларҙы яңынан иретеп йәбештереп сығырға тура килә. Инструменттарға, запас частәргә ҡытлыҡ юҡ, ебәреп торалар. Ҡайһы бер яйлан­ма­ларҙы үҙебеҙ үҙгәртеп ҡуябыҙ, ҡул аҫтында нимә бар, шуларҙан деталдәр ҙә эшләп алабыҙ. Бына был “КАМАЗ”ға дронға ҡаршы “мангал” йә­бештереп ятабыҙ, эшлектән сыҡҡан радиаторын да ал­маштыраһы бар. Башҡа урын­дары бик зыян күрмәгән”, – ти,   бөгөнгө эше менән таныш­тырып, яугир.  
“Рысь” позывнойлы яугир,  махсус хәрби операцияға кил­гәнсе, янғын һүндереүсе-ҡот­ҡарыусы булып эшләгән. 2023 йылдан алып ремонт рота­һында.
– Беҙҙең эштә тиҙлек кәрәк. Механиктар тиҙ арала, төрлө ҡатмарлыҡтағы автомобилде ремонтлап, алғы һыҙыҡҡа оҙата. Эшебеҙ еңел түгел. Башҡор­тостандан даими ярҙам килеп тормаһа, ауырыраҡ булыр ине, – ти ул.
Командование алтын ҡул­лы оҫталарҙың эштәрен юғары баһалай: яугир­ҙар­ҙың күбеһе орден-ми­ҙалдар менән на­градланған. 
Хәрби механиктарҙың эш­тәре күренеп бармаһа ла, сафтан сыҡҡан хәрби тех­никаның төҙөклөгө, фронт­тағыларҙың эштәре көйлө барыуы – уларҙың эшенең һөҙөмтәһе. 
 Һеҙҙең ҡулдан үткән ошо автомобилдәрҙә Еңеү бай­раҡтары елберләгәнен дә күрергә яҙһын, егеттәр! 

Зөһрә ЙӘҺҮҘИНА.
Өфө – Луганск – Өфө.