Йән иләйем

Аҡ болоттай итеп тетеп һалғас,
Йөн иләгес ҡуйҙым алдыма,
Уң ҡулымда тотҡан орсоғома
Өйөрөлтөп йөн еп урала.

Ҡул йылыһы, күңел наҙҡайҙары
Ошо һуҙған епкә ҡушыла,
Иләгән йөн ап-аҡ юл шикелле
Бик күп саҡрымдарға һуҙыла.

Иләп бөткәс сиратып алырмын
Йөн ептәрем ныҡлы булһындар,
Аяҡлаған йөндәр йыуғандан һуң
Йомғаҡтарға кереп тулһындар.

Күңел йылым ҡушып һәр күҙенә
Йөн башалтайҙарым бәйләрмен,
Ә әлегә тыныс кистәремдә
Орсоғомда йөн еп әйләнһен.
Фәүзиә Ҡотлогилдина – АЛТЫНБИКӘ.

Юлай Кәримов фотоһы.