Өфөлә йәшәүселәр финанс аферистарына ҡаршы торорға нисек өйрәнә?

Иң сағыу миҫалдарҙың береһе - 77 йәшлек пенсионерҙың тарихы. Уға үҙен "Энергосбыт" хеҙмәткәрҙәре тип танытҡан мутлашыусылар шылтырата һәм әбейҙән миллион һум самаһы аҡса алырға маташа. Әммә уяу банк хеҙмәткәрҙәре ваҡытында хәүефте таный. Уларҙың оператив эшмәкәрлеге арҡаһында оло йәштәге әбей үҙенең аҡсаһын һаҡлап ҡалыуҙан тыш, полициянан заманса мутлашыу схемалары тураһында ентекле инструктаж да алған.

"Банк хеҙмәткәрҙәре" шылтыратыуҙарынан аптырап ҡалған 77 йәшлек әбей сит кешеләргә 400 мең һум аҡса күсерергә әҙер булған. Банкомат янында уның ҡалтыранып тороуын аңғарған 34 йәшлек ҡатын хәлде аңлаған һәм шунда уҡ полиция саҡыртҡан - енәйәт иҫкәртелгән.

83 йәшлек әбейҙең тарихы айырыуса иғтибарға лайыҡ. Уны мутлашыусылар ашығыс рәүештә "сотовыйҙың операторы менән килешеүҙе оҙайтыу" кәрәклегенә ышандыра. Пенсионер банкка 640 мең һумға килгәс, учреждение хеҙмәткәре, бер ни ҙә булмауына шикләнеп, оҫта итеп ваҡытты ота - ҙур сумманы өс көн эсендә биреү ваҡыты тураһында хәбәр итә. Был әбейгә улы менән кәңәшләшергә мөмкинлек бирә, ул уға мутлыҡ схемаһына күҙҙәрен аса.

Был осраҡтар Өфөлә финанс аферистарына ҡаршы һөҙөмтәле система булдырылыуын күрһәтә. Унда хоҡуҡ һаҡлау органдары ғына түгел, ә уяулыҡ һәм гражданлыҡ яуаплылығы күрһәткән ябай граждандар, банк хеҙмәткәрҙәре лә төп роль уйнай.

Әле БР буйынса ЭЭМ "Иғтибар! Мутлашыусылар!" иҫкәртмә операцияһын уҙғара. Хоҡуҡ һаҡлаусылар иҫкә төшөрә: банктарҙың һәм дәүләт учреждениеларының ысын хеҙмәткәрҙәре бер ҡасан да аҡса күсереүҙе йәки шәхси мәғлүмәттәрҙе телефон аша хәбәр итеүҙе һорамай. Айырыуса оло йәштәге туғандар менән аңлатыу әңгәмәләре үткәреү мөһим, улар йыш ҡына мутлашыусыларҙың ҡорбанына әйләнә. Иҫегеҙҙә тотоғоҙ: һеҙҙең уяулыҡ үҙегеҙҙең генә түгел, яҡындарығыҙҙың да аҡсаһын ҡотҡара ала!

Рәсәй ЭЭМ-ның Өфө ҡалаһы буйынса Идаралығы матбуғат хеҙмәте