Мәнфәғәтен күр, ветеран!

Радик Йосопов МХО-ға өлөшләтә мобилизация ваҡытында алына. Яҡташыбыҙ алғы һыҙыҡта хәрби бурысын үтәгәндә ҡаты яраланып ҡайта. Бер ҙә күңел төшөнкөлөгөнә бирелмәй ул – адаптив спорт төр­ҙәре менән шөғөлләнә. Күмертауҙа һаулыҡ мөмкинлектәре сикләнгән кешеләр араһында саңғы ярышында ла ҡатнашырға өлгөрә. Уға бағыусылар ярҙамында саңғылы сана ла эшләгәндәр. Тиҙ­ҙән юлға – ветеран республика махсус хәрби операция вете­ранда­ры­ның йыйылма ко­ман­даһы сос­тавында Бөтә Рәсәй “Ватанды һаҡлаусылар кубогы”­на барасаҡ. Ярыштар мартта Ханты-Манси автономиялы округында ҡышҡы спорт төрҙәре буйынса үтә.
Радик Йосоповҡа быға тиклем дәүләт фонды булышлығында вертикализатор, электр приводлы һәм өҫтәмә функциялы кресло-коляска ла тапшырылған. Автомобиль алыу өсөн былтыр ноябрҙә ДОСААФ-та уҡып сыҡҡан. “Ватанды һаҡлаусылар” дәүләт фондының ҙур ярҙамы менән машиналы ла булған. Яугир әле “Газпром”да эшләй. Ватан һаҡсыһына һаулыҡ, тормош һы­науҙарына бирешмәй йәшәүен теләйбеҙ!

А. АҠБУЛАТОВА.
Фото – “Ватанды һаҡлаусылар” дәүләт фондының “Бәйләнештә”ге төркөмөнән.

Яугир
ҡатындары –
эшҡыуарлыҡта 

Башҡортостанда махсус хәрби операцияла ҡатнашыусыларға һәм уларҙың ғаилә ағзаларына 40-тан ашыу төр ярҙам сараһы булдырылған. Былтыр декабрҙә “СВОй женский бизнес” программаһы буйынса уҡыу башланғайны. Ошо көндәрҙә 50 гүзәл зат – махсус хәрби операцияла ҡатнашыусыларҙың сабыр ҡатындары – сертификат алған.
Әлеге проект БР Башлығы фонды яр­ҙамында ғәмәлгә ашырылған. Ике ай буйы ҡатын-ҡыҙҙар бизнес алып барыу серҙәренә өйрәнгән. Шулай уҡ улар менән психологтар ҙа эшләгән.
Белем биреү программаһында 13 эксперт ҡатнашҡан. Улар ҡатын-ҡыҙҙарға эш­ҡы­уарлыҡтың төрлө йүнәлеше буйынса кә­ңәштәр, консультация, башланғыс белем биргән.
Финалға ун ҡатнашыусы һайлап алынған. Ә еңеүселәр түбәндәгеләр: кейем тегеү проекты менән Айгөл Сәфиуллина,  дөрөҫ туҡланыу ризыҡтарын ташыу проекты менән Вилә Юлдыбаева, биҙәүестәр эшләүсе Светлана Еремеева һәм гравировкалы әйберҙәр авторы Наҙгөл Михайлова. Уларға бизнес-ниәттәрен үҫтереүҙә ярҙам күрһәтеләсәк.

А. ЗИННУРОВА.

Ҡайҙа ғына бармай, ниҙәр күрмәй ир-егеткәй менән ат башы...
башҡорт халыҡ йырындағы ошо һүҙҙәр әлеге көндә лә актуаль. Беҙ бәләкәй саҡта ололарҙың: "Илебеҙ тыныс булһын, беҙҙең балалар һуғыш күрмәһен инде..." – тигән һүҙҙәренә артыҡ иғтибар бирмәй торғайныҡ. "Нисек инде тағы һуғыш булырға тейеш? Бар кешелек һуғыштың ниндәй аяуһыҙ икәнен белә лә инде... Күрәләтә кемдең һуғышҡыһы килеп торһон..." – тип уйлай инем.

Нисек кенә ауыр булмаһын, бөгөнгө көндә илебеҙ көсөргәнешле мәл кисерә.  Ҡайҙалыр туптар шартла­ғанда, пу­лялар яуғанда, ил өсөн ғүмерҙәр ҡы­йылғанда тыныс күңел менән йәшәү мөмкин түгел. Ир-егет­тәребеҙҙән кем­дәрҙер – йөрәк, кемдәрҙер ил саҡырыуы буйынса бөгөнгө көндә Украинала барған махсус хәрби опе­рацияға юлланды. Ватанды һаҡлау элек-электән ир-егеттең изге бурысы һа­налған, юҡҡа ғына ла, ил яҙ­мышы – ирҙәр ҡулында, тимәй халҡым...
Әсхәт Әхмәтғәле улы Ҡунаҡасов – шундай уҙамандар­ҙың бе­реһе. Тыумышы менән ул Хәйбулла ра­йонының Аҡъяр ауылынан. 1978 – 1988 йылдарҙа хәрби бурысын намыҫ менән үтәп ҡайтҡан. Ҡатыны Рәзимә апай менән ул һәм ҡыҙ үҫтереп, хәҙер инде ике ейәнгә ҡартатай һәм ҡартәсәй улар.
Махсус хәрби операцияға алынғанға тиклем Әсхәт Әхмәтғәле улы Өфө ҡала­һының "Башкир­автодор" юл ремонтлау идаралығында эш­ләй. Намыҫ менән хеҙмәт иткән кеше, шулай уҡ Өфө ҡалаһының почетлы доноры. Ейән­дәренең яратҡан ҡар­татаһы.
Махсус хәрби операция баш­ланыу менән уның күңелендә тынғылыҡ юғала. Инде пенсия йәшенә еткән ир-уҙа­мандың йәш егеттәрҙең мәрхүм булып ҡайтыуын ишеткән һайын йөрәге һыҙ­лай, ил киләсәге өсөн борсола. Аңҡы-тиңке килеп йөрөгән мәлдә һуғышҡа алыу йәшен оҙайтҡандарын белеп ҡала. Ә уға әле 64 йәш. Һәм бер көн дә барып, махсус хәрби операцияға алыуҙарын һорап ғариза яҙа. Әлбиттә, балалары, ҡатыны көтөлмәгән яңылыҡтан шаңҡып ҡалалар. Ләкин ҡай­ғырып ултырырға ваҡыт юҡ, уларға Әсхәт ағайҙың был етди аҙымын аңлап ҡабул итеүҙән башҡа сара ҡалмай.
Әлбиттә, ҡартатай кешегә хаҡлы ялда рәхәтләнеп ейән­дәрен ҡарашып, ба­лыҡҡа йөрөп, баҡса үҫтереп кенә ятырға ла булыр ине... Ләкин ҡанда ҡайнаған яугир рухы, ватансылыҡ тойғоһо уға тыныс ятырға бирмәй шул.
"Әҙ генә булһа ла файҙам, ярҙамым тейер... Ҡайҙалыр йәш егеттәрҙең йәне ҡыйылғанда, нисек йәнем түҙһен, нисек өйҙә тыныс ултырмаҡ кәрәк?!" – тип аңлата ул был аҙымын яҡын­дарына. Киткәненә ярты йыл ваҡыт үтеп китте. Көн аша, ике көнгә бер шылтыратып хәл­дәрен белдереп тора, тип һөйөнә ҡатыны Рәзимә апай. Ул, хәҙер күндек инде,  «Имен-һау ғына йөрөп ҡайтһын, тиҙерәк һуғыш бөтһөн!» – тип теләйбеҙ һәр ваҡыт, ти. Данил ейәне лә «Ҙу-ур үҫкәс, мин дә ҡартатайым кеүек батыр булам. Дошман­дарҙы еңеп ҡарта­та­йымды алып ҡайтам» тип хыяллана. Булыр, булыр...  Исемен дә илен данлаусы, илһөйәр булһын тип юҡҡа ҡушмағандар бит ул!
Илебеҙгә тиҙерәк тыныслыҡ килһен! Балаларыбыҙ һуғыш­тың ни икәнен дә белмәй үҫһен ине. Әсхәт Ҡунаҡасов кеүек ҡартатайҙар ейән-ейән­сәрҙәрен үҫте­решһен! Ошондай батыр йөрәкле ҡартатайҙар барҙа иле­беҙ бирешмәҫ, мотлаҡ Еңеү килер!

Шәүрә ЯРМУЛЛИНА. 
Өфө ҡалаһы.