Башҡортостанда Халыҡ фронты Донецк балалар баҡсаһын шефлыҡҡа алды

Бындай инициатива менән Башҡортостандағы Халыҡ фронты вәкиле, Донецк йүнәлешендә хәрби бурысын үтәгән «Умас» позывнойлы яугир сығыш яһаған. Был изге эшкә тәүгеләрҙән булып «Салауат Юлаев» хоккей клубы һәм республика мәғариф хеҙмәткәрҙәре профсоюзы ҡушылған. Шулай уҡ Бәләбәй районынан бер эшҡыуар ҡорамалдарҙы буяу өсөн буяу биргән.

"Донбасс балаларына уйынсыҡтарҙы ҙур шатлыҡ менән тапшырабыҙ. Бүләктәр Донецк ҡалаһының 23-сө балалар баҡсаһындағы балалар өсөн тәғәйенләнгән. Улар менән бергә йөрәгебеҙҙең, йәнебеҙҙең бер өлөшөн ебәрәбеҙ. Балалар сәләмәт һәм бәхетле булып үҫһен", - тип билдәләне республика мәғариф хеҙмәткәрҙәре профсоюзы рәйесе Елена Хаффазова.

Балалар баҡсаһында ете йәш ярымдан алып 34 бала тәрбиәләнә. 20 ғинуарҙан 75 балаға иҫәпләнгән учреждение тулы көн эшләй башланған һәм 100 процентҡа эш менән тәьмин ителеүе көтөлә. Уйынсыҡтар бик тә урынлы килеп сыҡты.

"Беҙ партнерҙар менән шулай уҡ Луганск, Перевальск һәм Антрацит балалар йорттарына ярҙам итәбеҙ. Әгәр ҡушылырға теләһәгеҙ, Өфө ҡалаһы, Киров, 1-138 адресы буйынса уйынсыҡтар һәм балалар кейеме (яңы һәм этикеткалар менән генә) алып килә алаһығыҙ. Халыҡ фронты тиҙ арала барыһын да бәләкәй адресаттарға еткерәсәк", - тип һыҙыҡ өҫтөнә алды Халыҡ фронтының Башҡортостандағы бүлексәһе етәксеһе Виталий Брыкин.