Ишеттегеҙме? Балалар Ҡыш бабайҙан һорау алған!

"Ҡыш бабайҙың НТВ менән сәйәхәте" хәйриә акцияһы илдең 24 ҡалаһында уҙа, уларҙың береһе - Өфө. Бер көн элек проект командаһы (уға Ҡыш бабай менән бер рәттән НТВ спорт күҙәтеүсеһе Кирилл Кикнадзе ла инә) инклюзияны үҫтереү менән шөғөлләнгән «Беҙҙең киләсәк» хәйриә фонды тәрбиәләнеүселәре менән аралашты. Балалар өсөн Өфөнөң селтәрҙәр менән идара итеү үҙәгенә һәм трансформатор заводына экскурсия ойошторҙолар, һуңынан шыршы байрамы үткәрҙеләр.

Бөйөк Устюгтан килгән Ҡыш бабай ете бала тәрбиәләнгән Дәүләтовтар ғаиләһенә лә барып өлгөргән. Ул бәхетһеҙ осраҡ һөҙөмтәһендә ҡулдарын юғалтҡан 13 йәшлек Илназдың хыялын тормошҡа ашыра - синтезатор бүләк итте.

Баш ҡала хакимиәтендә үткән матбуғат конференцияһында йәш журналистар Ҡыш Бабайға һорауҙар бирә алды. Балаларҙы барыһы ла ҡыҙыҡһындырҙы: ҡышҡы сихырсы кейгән аяҡ кейеме лә, унан һораған ғәҙәти булмаған бүләктәр ҙә, уның иң ҙур хыялы ла. Ҡыш Бабай балаларға уны нисек ҡунаҡ итеүҙәре һәм Өфөләге ниндәй урындар уға иң оҡшағанын һөйләне. Аҙаҡтан бөтә балаларға ла татлы бүләктәр тапшырылды, һәр кем шыршы янында Ҡыш Бабай менән фотоға төшә алды.