МХО биләмәһендәге яугирҙарыбыҙ башҡорт сәйен эсеп, исмаһам, бер рәхәтләнеп алыр!

Шөкөр, хеҙмәттәштәребеҙ алыҫ араны имен-аман үтеп, тейешле урынға барып етеп, МХО биләмәһендә хәрби бурыстарын үтәүсе егеттәребеҙгә кәрәкле йөктө тапшырҙы, шул иҫәптән "Йәшлек"тәр әҙерләгән "Еңеү сәйҙәре" лә. Журналистар, гәзит-журналдарҙың тоғро дуҫтары берҙәмлеге менән ГАЗельға был юлы маскировкалау селтәрҙәре, бензин бысҡыһы, консерва тушенкалары һәм башҡа төрлө күстәнәстәрҙән тыш 12 тимер мейес – “буржуйка” кеүек кәрәкле йөк тейәлде.

Илебеҙҙең имен киләсәге өсөн алыш дауам итә икән, тимәк, был эш – гуманитар ылау оҙатыу – туҡтарға тейеш түгел. Һәр кемебеҙ ил менән берҙәм булырға бурыслы, илебеҙ киләсәге өсөн ҡанын ҡойған егеттәребеҙ-ҡыҙҙарыбыҙ менән бер тында булырға бурыслылыр. Бер ҡарауға ғына гуманитар ылау ул, ә ысынында иһә – ул берҙәмлек символы, өмөт, көс-ҡеүәт. "Еңеү сәйҙәре" тәмле һәм шифалы булһын, яугирҙарыбыҙҙың!