+8 °С
Ясно
Яңылыҡтар таҫмаһы
4 Октября 2024, 04:21
Кешеләргә игелек ҡыл, үҙеңде бәхетле тойорһоң
Иман һәм игелекле эш-ғәмәлдәр – бәхет асҡысы ул, уға эйә булырға тырыш. Яңы белем ал, күберәк уҡы, шулай ғына һин ҡайғыларыңдан арына алаһың. Тәүбәңде яңыртып тор, ә гонаһ ҡылыуҙан һаҡлан, сөнки ул йәшәүҙе ағыулай. Йышыраҡ Ҡөрьән уҡы, уҡығанда уның аяттары тураһында уйлан, Аллаһты зикер ҡыл. Кешеләргә игелек ҡыл, үҙеңде бәхетле тойорһоң. Йөрәгеңде асыуҙан,нәфрәттән, һаранлыҡтан һаҡла. Бар нәмәлә артыҡлыҡтан һаҡлан – ризыҡта, кешеләр менән аралашыуҙа, һүҙҙә һәм эш-ғәмәлдәрҙә. Артыҡ йөк юлсыға ауырлыҡ килтерә. Насар фекер һәм ниәттәрҙән һаҡлан. Асыуланма. Кисерергә, мәрхәмәтлек, шәфҡәтлелек күрһәтергә өйрән, ғүмер ҡыҫҡа – шуны онотма. Себендән фил яһама, ауырлыҡтың күләмен арттырма.
Кешеләргә игелек ҡыл, үҙеңде бәхетле тойорһоң
Күктәр ергә ишелеп төшөр ҙә, донъяны туфан яулап алыр тип, минут һайын көтмә. Бел, һәр бер нәмәнең үҙ ваҡыты: һин тарырға тейешле ваҡиға һине урап үтмәйәсәк, ә ишелергә тейеш булмаған нәмә ишелмәйәсәк, борсолорға сәбәп юҡ.
Ғәҙәти йәшәү рәүеше алып бар, артыҡ муллыҡтан һаҡлан, сөнки донъя ниғмәтенең артыҡлығы тулыһынса һине биләп ала, ә тән иркәлеге йәнгә яза бит ул.
Аллаһ Раббыбыҙ һиңә биргән барлыҡ бәрәкәтте юлыңда осраған һынауҙар менән сағыштыр. Шул ваҡыт аңларһың: һинең юғалтыуҙарың түгел, ә табыш, ҡаҙаныштарың күберәк бит.
Әгәр һиңә моңһоу икән, үҙеңә һәм башҡаларға файҙа килтерерлек бер хеҙмәт тураһында уйла һәм шул эшкә башың менән сум.
