Башҡортостан урта уҡыу йорттарында ҡабул итеү арттырыла

Бөгөн Башҡортостан хөкүмәтенең оператив кәңәшмәһендә Радий Хәбиров мәшғүллек системаһын тулыһынса реформалау хаҡында һөйләне. Был йәһәттән төбәк Башлығы мәшғүллектең туранан-тура әҙерлеккә бәйле булыуын, тәү сиратта урта махсус уҡыу йорттарындағы үҙгәрештәрҙе билдәләне.

— Беҙгә алдынғы колледждарҙа ҡабул итеүҙе арттырырға кәрәк. Көс һалығыҙ, өҫтәмә парталар ҡуйығыҙ, ҡайһы бер уҡытыусылар бюджеттан тыш аҡсаға уҡыта ала, — тип билдәләне Радий Хәбиров, республиканың мәғариф министрына мөрәжәғәт итеп. — Һеҙ кеше һанын 500-гә арттырҙығыҙ, ә беҙҙең ихтыяж күпкә ҙурыраҡ. Беҙ глобаль кимәлдә ике мәсьәләне хәл итәбеҙ: беренсенән, бала тап ошо колледжға уҡырға инергә теләй, шуға күрә уға был мөмкинлекте бирегеҙ! Ә икенсеһе – беҙ һөйләгән ресурстар.

Радий Хәбиров Башҡортостан хөкүмәте премьер-министрының беренсе урынбаҫары Урал Килсенбаевҡа урта махсус уҡыу йорттарында тағы ла 2 мең урын булдырыу бурысын ҡуйҙы.

— Ҙур һанды алайыҡ. Беҙҙә 90-дан ашыу колледж бар,  уларҙың 30-ын үҙегеҙгә саҡырығыҙ. Беҙ матди базаны колледждарҙың ихтыяждарына көйләй алмайбыҙ, тимәк, ҡатмарлыраҡ шарттарҙа эшләргә тура киләсәк, – тине Радий Хәбиров.

Республика Башлығы мәғариф буйынса август кәңәшмәһенә әҙер ҡарар менән сығырға ҡушты.