Бөгөн - Шиғриәт көнө

Шағир ғүмере

Нисәнсе төн мин һаҡтамын,

Уйҙар – бөтмәҫ ғазаптар...

Аң йоҡламай. Бөгөн тағы

Төн-Йыһанды ҡутарҙым.

Һаман ҡурҡам киләсәктән,

Бер аяғым – үткәндә.

Бөгөнөмдә йәшәр өсөн,

Етмәй әле тәжрибә.

Үткәндәргә күҙ һалғанда,

Томалана күңелем.

Киләсәккә талпындыммы –

Томанлана күҙҙәрем.

Дау-яу яланында аңым,

Ҡасан бөтөр шул дау-яу?

Ҡасан шағир күңеленә

Булыр был донъя аяу?!

Ниндәй гонаһ ҡылдым икән,

Нишләп сирләй күңелем?

Кем ебәргән миңә ҡарғыш –

Ошо шағир ғүмерен?...

Юлай Кәримов фотоһы.