Газ баллондарын 10 йылдан артыҡ файҙаланыу тыйыла

2017 йылдан 2023 йылға тиклем Башҡортостанда газ ҡорамалдарын файҙаланыу ҡағиҙәләрен боҙоу сәбәпле, 209 янғын теркәлә, уларҙа 26 кеше һәләк була, 42 кеше төрлө тән йәрәхәттәре ала. Был хаҡта БСТ-ла үткән брифингта Ғәҙәттән тыш хәлдәр министрлығының Башҡортостан буйынса Баш идаралығы начальнигының беренсе урынбаҫары Эдуард Иҙриссов һөйләне.

— Рәсәйҙә былтыр ошондай 1510 осраҡ теркәлгән, ҡыҙғанысҡа ҡаршы, 164 кеше һәләк булған. Республикабыҙҙа былтыр газ ҡорамалдарына бәйле 41 авария теркәлгән, һөҙөмтәлә 10 кеше йәрәхәтләнгән, тағы ла 4 кеше, ҡыҙғанысҡа ҡаршы, һәләк булған. Һуңғы 5 йылда авариялар тураһындағы мәғлүмәттәрҙе анализлау был статистиканың арта барыуын күрһәтә. Әгәр 2016 йылда фажиғәләр һаны 30-ға яҡын булһа, 2022 йылда — 41 осраҡ. Быйыл ике ай эсендә 6 осраҡ теркәлгән, ҡыҙғанысҡа ҡаршы, 1 кеше һәләк булған, 4-ө ауыр йәрәхәттәр алған, — тине Эдуард Иҙриссов.

Ул шулай уҡ Рәсәй Ғәҙәттән тыш хәлдәр министрлығының граждандар хәүефһеҙлеген тәьмин итеү буйынса хәл-ваҡиғаларға оператив яуап биреүе тураһында ентекле һөйләне:

— 2014 йылда һәм беҙҙең республикала бер нисә йыл дауамында көнкүреш газы шартланы. Ҡайһы бер осраҡтарҙа был көнкүреш газ ҡоролмаларын файҙаланыу ҡағиҙәләрен боҙоу менән бәйле була, йәғни башлыса ҡышын, һыуыҡтан йортҡа газ баллоны ҡоролмалары индерелә һәм газ киңәйә, ә баллон үҙе 85 процентҡа тиклем тултырыла, был хәүефһеҙлек күҙлегенән ҡабул ителмәй. 

Ҡайһы бер йорттарҙа газ баллондары көнкүреш ихтыяждары өсөн ҡулланыла, уның торлаҡта ҡулланыу күләме 5 литрҙан артмаҫҡа тейешлеген һыҙыҡ өҫтөнә алам. Уның бер ниндәй ҙә зыяны булырға тейеш түгел (ярыҡ, тут һ. б.), бындай баллондарҙың хеҙмәт итеү мөҙҙәте — 10 йыл. Газ тултырыу тик махсус урындарҙа ғына башҡарылырға тейеш.