Ҡылған батырлыҡтары утыҙ йылдан һуң баһаланды

1991 йылдың көҙөндә Өфө ҙур экологик һәләкәткә тарый. Өфө нефть эшкәртеү заводында 150 метрлыҡ төтөн торбаһы ҡыйшая башлай. 120 метр бейеклектә тимер-бетон конструкция һына һәм углеводород етештереү майҙансығы өҫтөндә 700 тонна ауырлыҡтағы бетон эленеп ҡала. Торба емерелгән осраҡта күләмле янғын сығыуға, ә уның ҡолауы Өфөлә 9 баллы ер тетрәүгә килтерер ине.

Мәскәүҙән Өфөгә РСФСР-ҙың Ғәҙәттән тыш хәлдәр буйынса дәүләт комитеты белгестәре, ҡотҡарыусылар, альпинистар, спелеологтар ебәрелә, шулай уҡ инженер ғәскәрҙәренең хәрби белгестәре төркөмө лә килә.

«Беҙ торба ҡолаған хәлдә түбәндә урынлашҡан цехтар, ҡоролмалар һәм завод коммуникациялары зыян күрәсәген аңланыҡ. Быларҙың барыһы ла ҙур иҡтисади зыян килтереүҙән тыш, миллионлы ҡалаға экологик катастрофа, күп кешенең һәләк булыуына һәм Ағиҙел йылғаһының ағыуланыуына килтереүе ихтимал. Беҙгә уны бейектә шартлатыу ғына түгел, кәрәкле урынға, ҡом «яҫтығына» төшөрөү бурысы ҡуйылды. Шартлау иҫ киткес шәп башҡарылды. Торбаның имен өлөшөнә зыян килтермәй, һынған торбаны бейектә шартлата алдыҡ», — тип хәтерләй Виталий Аппель.