Кураторлыҡ институты проекттары хаҡында һөйләштеләр

– Округтың төбәктәре менән берлектә проекттарҙы әҙерләү һәм һайлап алыу буйынса ҙур эш атҡарабыҙ. Улар төрлө тармаҡта социаль-иҡтисади үҫешкә йүнәлтелгән проекттар. Йыл ярым ваҡыт эсендә кураторлыҡ институты булдырылғандан алып яңы бурыстар килеп тыуҙы. Быйыл проекттарҙы төҙөп бөтөп барабыҙ, ниһайәт, – тине Игорь Комаров.

Рәсәй Хөкүмәте рәйесе урынбаҫары Дмитрий Чернышенко һүҙҙәренсә, Волга буйы федераль округы кураторлыҡ институты проекттарын тормошҡа ашырыу буйынса бөтә округтар араһында өсөнсө урында килә.

– Санкциялар арҡаһында проекттарҙы яңынан үҙгәртеп ҡорҙоҡ. Улар барыһы ла уникаль, халыҡҡа кәрәкле. Беҙҙең төп бурыс – улар ярҙамында халыҡ тормошон яҡшыртыу, – тине Дмитрий Чернышенко.

Атап әйткәндә, һүҙ милли проекттарҙы, дәүләт программаларын тормошҡа ашырыу, федераль министрлыҡтар менән эшләү хаҡында барҙы, яңы күрһәтмәләр бирелде, бурыстар ҡуйылды.