Салауат Юлаев батальоны хәрбиҙәре махсус операцияға юлланыр алдынан мөхәббәтен законлаштырҙы!

Ғаиләләрегеҙ менән тиҙерәк осрашырға, имен-аман йөрөп ҡайтырға яҙһын!

Рәсәй гвардияһының Салауат Юлаев исемендәге батальонынан ике яугир һөйгәндәре менән мөхәббәтен законлаштырҙы. Тантаналы сара Өфөнөң Октябрь районы ЗАГС-ында үтте.

Мендельсон маршы, теркәүсенең тантаналы һүҙҙәре... Ғашиҡтар бер-береһенә «эйе» тип ризалыҡ бирҙе һәм балдаҡтар менән алмашты. ЗАГС белгесе йәштәргә никахты теркәү тураһында таныҡлыҡ тапшырҙы.

Хәрбиҙәрҙе һәм уларҙың һөйгәндәрен батальон командирының хәрби-сәйәсәт буйынса урынбаҫары, яҡындары һәм дуҫтары ҡотланы. Иң мөһиме: йортта беҙҙе яҡындарыбыҙ, атай-әсәйҙәребеҙ генә түгел, һөйөклө ҡатындарыбыҙ ҙа көтәсәк, тине ирекмәндәр.