«Күгиҙел Корчагины»

Йәшәйеш миндә ни өсөндөр һағышлы ғәжәпләнеү тыуҙыра. Бер үк мәлдә тыуып үҫкән төбәгендә кемдеңдер ҡояшы бата, ә кемдеңдер ғүмер ҡояшы сығып килә, берәүҙәр шатлыҡ тулҡынында тирбәлә, бәғзеләр яҙмыштың әсе елдәренә тырышып-тырмашып ҡаршы тора. Сәйер тормош...
Баймаҡ районының Күгиҙел ауылында йәшәүсе I төркөм инвалиды Шәрифулла Мәүлитов­тың яҙмышы күптәрҙе тет­рән­дерерлек тә, һоҡлан­дырырлыҡ та. Әрмегә тиклем Өфө урман техникумын тамамлаған егет, Хәрби-диңгеҙ флотынан һуң мәктәптә химия уҡытыусыһы  булып  хеҙмәт юлына баҫа.  Юғары белем алыу теләге менән ситтән тороп Башҡорт дәүләт универ­си­тетының химия-биология факультетына уҡырға инә. Уның яҙмышын 180 градусҡа үҙгәрткән күңелһеҙ ваҡиға шул йылдарҙа була.  Дөйөм ятаҡ­тағы аш-һыу бүлмәһенең иҙәне ише­леп, икенсе ҡаттан ҡолап төшә, умыртҡа һөйәген им­гәтә ул. Йылдар дауамында  дауа­ханаларҙа ятыу ҙа ыңғай һөҙөмтә  бирмәй.
Аллаһы Тәғәлә тарафынан ебәрелгән һынауҙы нисек бар шулай ҡабул итә белергә өйрәнә Шәрифулла. Таяныр таяуы – ҡатыны Миләүшә, балалары юл сатында ҡалған саҡта уға йәшәргә көс бирә.  Дистанцион рәүештә көнкүреш кәрәк-ярағын, электрониканы йү­­нә­теүсегә уҡып, үҙе өсөн яңы йүнәлеш аса, яңы һөнәр үҙләштерә.   «Ҡулы эш белгән кеше шөғөлөн дә таба, донъяһын да бөтәйтеп йәшәй», – ти Шәрифулла.
Бынан теүәл утыҙ йыл элек Башҡортостандан бер төркөм егет «Төньяҡ амурҙары» хәр­би-патриотик клубы составында Бородиноға сәфәр ҡыла.  Улар араһында Шәрифулла Шә­кирйән улы ла була. Бөгөн иһә ойошманың эшмәкәрлеген интернет аша күҙәтеп, уңыштары өсөн һөйөнә.
Тормош юлында осраған кәртә-ҡаршылыҡтар алдында баҙап, юғалып ҡалмай, ысын ир-егеттәргә хас ғорурлыҡ менән ихтыяр көсөн егеп, изге уй-ниәттәр ҡороп йәшәй  замандашыбыҙ  Шәрифулла Шәкирйән улы Мәүлитов. Уның артабан да бирешмәүен теләйбеҙ.
«Йәшәү йәме» тап­шырыуы­ның яҙмаһын  https://bash.news/yuldash  сайтында  тыңларға мөмкин.

Клара ШӘРИПОВА.