Ауыр енәйәттә ғәйепләнгән Кушнаренко уҡытыусыһын аҡлағандар

Был хәл өс йыл элек Кушнаренко ауылы мәктәбендә теркәлгәйне. ОБЖ уҡытыусыһы енси ҡағылғыһыҙлыҡҡа бәйле өс тапҡыр енәйәт ҡылыуҙа ғәйепләнде. 

Уҡытыусыны ошо хәлдән һуң эштән ҡыуҙылар. Мәктәп етәкселеге, балаларҙың ата-әсәләре полицияға ғариза яҙҙы. Педагог журналистарға видеола ни ҡылыуын аңлатҡан булған. Үҙе әйтеүенсә, ул ошо рәүешле ҡыҙҙы гимнастика буйынса ярышта еңеүе менән ҡотлаған. Йәнәһе, шатлығынан хис-тойғоларын йүгәнләй алмаған. Бындай "ҡотлауҙа" бер ниндәй ҙә криминал күрмәүен белдергән.

Ошо көндәрҙә Кушнаренко район суды педагогтың ғәйепле булмауын таныған.