Ҡытайҙарҙы ҡыуандырҙылар

Өфөләр ҡунаҡтар ҡапҡаһына тәүге осорҙа юл таба алмаһа ла, икенсе осор башында  23 йәшлек һөжүмсебеҙ Данил Алалыкин күпселектә миҙгелдәге тәүге шай­баһын индерҙе. Ул әлегә икенсе тапҡыр ғына боҙға сыҡты. Йәрәхәтләнеү сәбәпле, миҙгел алды уйындарында ҡатнашманы. 
Осор бөтөп килгәндә Джошуа Ливо Кайл Кейзерҙың ҡапҡаһына икенсе шайбаны сойорғотоп, өфөләрҙең өҫтөнлөгөн арт­тырҙы. Әйтергә кәрәк, Канада уйынсыһы 9 уйында 12 (5+7) мәрәй йыйып, миҙ­гелдең иң шәп биш бомбардиры исем­легенә инде. Ул, үткән плей-оффты ла иҫәпкә алғанда, 15 уйында рәттән 21 (9+12) мәрәй йыйған. Әгәр ике уйында голдар индерһә, Александр Радуловтың рекордын ҡабатлаясаҡ, ты­рышһа, уны үтеп тә китәсәк.
Икенсе тәнәфестән һуң Ҡытай егеттәре уйынын бөтөнләй үҙгәртте – туҡтауһыҙ һөжүмгә күсте.
Өсөнсө осор уртаһында Тайлер Граовац иҫәпте бер шайбаға ҡыҫҡартты, өс минут та үтмәне, йәнә алға ынтылып, иҫәпте тигеҙләне.
Ошонан һуң беҙҙекеләр тамам ҡау­шаны, кәрәкмәгәндә хаталана башланы. Люк Локхарт Александр Самоновтың ҡапҡа­һына өсөнсө шайбаны оҙатҡандан һуң, «Салауат»тың баш тренеры Виктор Козлов, гол дөрөҫ индерелмәне, тип иҫәпләп, су­дья­ларҙы видеояҙманы ҡа­рарға саҡырҙы. Һөҙөмтәлә арбитрҙар бер ниндәй ҙә хилафлыҡ тапмай, ҡағиҙә буйынса ху­жа­ларҙың бер уйынсыһын штраф эс­кәмйә­һенә оҙатты. 
Дэнни О,Риган дүртенсе голды ин­дергәндән һуң, өфөләр уйынды ҡотҡарыу өсөн иң шәп алты һөжүмсе менән дә бер ни ҡыла алманы. Өҫтәүенә, буш ҡап­ҡабыҙға Хадсон Элинюк бишенсе шайбаны индереп, ҡытайҙар 5:2 иҫәбенә хужаларҙы еңде.
Әйткәндәй, ҡытайҙар уйын булған көндә Ҡытай Халыҡ Республикаһы бар­лыҡҡа килеүҙең 75 йыллығын һәм ко­манданың КХЛ-да 500-сө уйынын үт­кәреүен бил­дәләне. «Куньлунь» ошо даталар айҡанлы көйәрмәндәренә һәм хал­ҡына  матур бүләк яһаны. Афарин!
Юлаевсылар ситтәге уйындарҙа көслө дәғүәселәр менән осрашырға йыйына. Улар бө­тәһендә лә еңмәҫ, был мөмкин дә түгел. Шулай ҙа хәлдәренән килгәнсә тырыш­һындар ине. 

Н.Тимеров