Әлегә беҙҙекеләр беренсе!

Үҙебеҙҙә өс уйында рәттән еңгәс, быныһында ла өфөләр хужаларҙы әллә ни йонсомайынса еңер кеүек ине. Ҡыҙғанысҡа ҡаршы, был өмөт аҡланманы: командабыҙ һуңғы һигеҙ йылда үҙ тарихында ҙур иҫәпкә – 1:6 – мәсхәрәле еңелде. Лидер­ҙарыбыҙ баштан уҡ үҙ уйынын таба алмай этләнде. Үткән миҙгелдә биш уйын рәттән «НХЛ-да иң яҡшы ҡапҡасы» тип табылған Александр Самонов та үҙ биләмәһендә бик ышанысһыҙ торҙо.
Уйын башында уҡ өфөләрҙең алабар­манлығы уңышһыҙлыҡҡа килтерҙе. Һаҡсы Никита Зоркин шайбаны юғалтып, үҙен бортҡа ҡыҫыуға ирек бирҙе. Сергей Збо­ровский тәүге шайбаны индерҙе. Тәүге осор тамамланып килгәндә Алексей Бывальцев ҡапҡабыҙға икенсе голды оҙатты. Әҙерәк ял иткәндән һуң юлаев­сылар үҙҙәрен ҡулға алып, һөжүмгә күсерме тиһәк, әлеге лә баяғы иғтибар­һыҙлыҡ арҡаһында штраф артынан штрафҡа юлыҡты. Джошуа Ливо судья­ларҙы кәмһеткәне өсөн штраф эскә­мйәһенә эләкте.
Икенсе осор башында Александр Хме­левскийҙың амбициялары сиктән ашып, Кёртис Волкка ташланыу менән, дүрт минутҡа уйындан ситләтелде. Һөжүмсе  Шелдон Ремпал бер үҙе генә алға ынтылып та гол индерә алманы. Ливо хужаларҙың хатаһы өсөн билдәләнгән буллитты фай­ҙаланманы. Хужаларҙың ҡапҡасыһы Евгений Аликин һис ҡау­шаманы – ҡап­ҡаһына уның шайбаһын индертмәне.
Өсөнсө осорҙа өфөләр уйынды ҡотҡарыу өсөн алға ынтылды. Тик Николай Зава­рухиндың былай ҙа ябыҡ командаһы беҙҙекеләргә бөтә юлды ла япты.
Шулай итеп, күршеләребеҙ «Салауат»ты күктән ергә төшөрҙө. Улар өфөләрҙең хаталарын бик оҫта файҙаланды: алты голдың икәүһен күпселектә индерҙе, лидерҙарҙың һәр береһен ҡарауыллап, ярты юлда туҡтатыуға өлгәште. 
Ярай, әлегә миҙгел башланып ҡына тора. Командабыҙ был «һалҡын душ»тан тейешле һығымта яһар, тип ышанырға ҡала. Баш тренерыбыҙ Виктор Козлов та уйындан һуң, ҡайһы бер звеноларға үҙгәрештәр индерелеп, яңы варианттар эҙләнәсәк, тип белдерҙе.
17 сентябрҙә юлаевсылар үҙ боҙонда Омскиҙың «Авангард»ын ҡабул итте. Беренсе осорҙа төп составҡа алынған йәш һаҡсы Илдан Ғәзимов тәүге шайбаһын индереп, иҫәпте асты. Ике минут та үтмәне, Артем Пименов шулай уҡ был миҙгелдә ҡунаҡтар ҡапҡаһына беренсе шайбаһын сойорғотто. Омск егеттәре лә төшөп ҡалғандарҙан түгел: беренсе осор аҙағында Семен Чистяков иҫәпте бер шайбаға ҡыҫҡартты.
Икенсе осор уртаһында Алексей Васи­левский индергән өсөнсө гол «Салауат»тың өҫтөнлөгөн арттырҙы. Тәнәфестән һуң ҡунаҡтарҙан Дамир Шәрипйәнов уңышҡа өлгәште.
Беҙҙең Александр Шаров уйындан-уйынға мәргәнлеген нығыта бара. Өсөнсө осорҙа ул ҡапҡасыбыҙ Александр Самонов ырғытҡан шайбаны эләктереп, дүртенсе голға әйләндерҙе.
Өфөләр биш уйындың дүртеһендә еңеп, 8 мәрәй йыйҙы. Улар индерелгән, үткә­релгән шайбаларының айырмаһы арҡа­һында әлегә бөтә уйында ла еңеп, тәүге урында килгән «Нефтехимик» командаһын ҡыҫырыҡлап, Көнсығыш конференция­һының турнир таблицаһында беренсе урынға сыҡты. Афарин! 
Ә инде «Авангард» менән уйна­ғанда башы менән боҙға бәрелеп йәрә­хәтләнгән Глеб Кузьминға тиҙерәк һауығырға яҙһын!