Бурыс бөттө. Бурыс ҡалды уйнарға

2023 йылдың 14 авгусында беҙҙең тәр­биәләнеүсебеҙ Родион Әмиров яҡты донъянан китте. Ул үҙен бөтәһе лә яратҡан сағыу, асыҡ һәм ыңғай холоҡло егет булараҡ күрһәтте. Родион Әмиров үҙ исемен ғү­мерлеккә «Салауат Юлаев» тарихына яҙҙы. Уның 27-се номеры әйләнештән сығарылды һәм мәңгелеккә уныҡы булып ҡалды. «Беҙ һине хәтерләйбеҙ һәм яратабыҙ, Родион!» – тиелә клубтың рәсми сайтында.
Ишембай егете «Салауат»тың фарм-клубы  «Толпар» составында 2019–2020 йылда МХЛ-да Көнсығыш конференцияһы еңеү­сеһе була. Төп команда өсөн 79 матчта, шул иҫәптән плей-оффта ла ҡатнашып, 18 (10+8) мәрәй йыя. 2020 йылда НХЛ-дың «Торонто Мэйл Лифо» командаһына 15-се һан аҫтында драфтҡа ҡуйыла. 2021 йылдың 15 апрелендә Америка клубы Әмиров менән өс йылға килешеү төҙөй.
2022 йылдың февралендә хоккейсының башында яман шеш табыла. Сит ил кли­никаларында дауаланыу һөҙөмтә бирмәй – ҡурҡыныс сир арҡаһында өмөтлө йәш спортсы 21 йәшендә генә мәңгелеккә күҙҙәрен йома.
Әйткәндәй, былтыр 21 августан 26-на тиклем йәштәр командалары араһында йыл да миҙгел алдынан үткәрелгән турнирға Родион Әмировтың исеме бирелде. Тәүге трофейҙы, хәл иткес уйында «Толпар»ҙы еңеп, «Мамонты Югры» командаһы яу­лағайны. «Белые медведи» – икенсе, хужалар – өсөнсө, «Стальные лисы» дүртенсе булды. «Турнирҙың иң яҡшы форварды» исеменә Өфө клубынан 8 (2+6) мәрәй йыйып – Сергей Колесников, «Иң яҡшы һөжүмсе»гә «Толпар»ҙан Александр Филиппов  лайыҡ булды.
Быйыл был ярыштар 20 августан 22-нә тиклем  Зорге урамында уҙҙы. Унда беҙҙең «Толпар», Силәбенең «Белые медведи», Ханты-Манси автономиялы ок­ругынан «Мамонты Югры», Магни­то­гор­скиҙың «Стальные лисы» командалары ҡатнашты.
Күптән килгән йолаға ярашлы 15 августан 19-на тиклем «Башҡортостан Республикаһы Кубогы» миҙгел алды турниры ла ғәҙәт­тәгенсә үтеп китте. Уның йомғаҡтары бу­йынса 6 мәрәй йыйған Череповецтың «Северсталь» командаһы таблицала тәүге урынды алды  һәм төп трофейҙы – кубокты яуланы. 
Шулай уҡ алты мәрәй йыйған  «Салауат Юлаев» икенсе урын алды. Ул «Северсталь» егеттәренә 0:1 иҫәбенә еңелде.
Екатеринбургтың 5 мәрәй туплаған «Ав­томобилист» командаһы өсөнсө урынға сыҡты.
Уҙған миҙгелдә Гагарин Кубогын яулаған «Металлург» ике генә мәрәйе менән – дүртенсе, Нижнекамскиҙың «Нефтехимик» командаһы (ике мәрәй) һуңғы – бишенсе булды.
Юлаевсылар 27 августа Магнитогорскиға Ромазан кубогына юллана. Уларҙың унда лайыҡлы уйнарына өмөт ҙур.
Командабыҙға ҡағы­лышлы тағы бер яңы­лыҡ: Стәрлетамаҡ еге­те, әлеге мәлдә Ханти-Манси округының «Югра»­һында һө­жүмсе булараҡ уйнаған 18 йәшлек Артур Фәйе­зовты аҡсалата ком­пенсацияға һатып ал­ды.
Үткән миҙгелдә йәш уйынсы ВХЛ-дың 13 матчында уйнап, ике мәрәй йыйҙы. Ка­рьераһын 2022 йылда «Ма­монты Югры» коман­даһында башлаған,  2023 йылда «Югра»ға күсте.
Йәштәр хоккей лигаһында үткәрелгән ике миҙгелдә Артур Фәйезов 59 уйында 25 мәрәй (14+11) туплай.

Ә.Хызырова.