Төп кубок өсөн көрәш ҡыҙа

Быйылғы плей-оффтың сирекфинал уйындары хоккей көйәрмәндәренә ысын байрам бүләк итһә, айырым командаларҙың уйындары белгестәрҙең фараздарын өлөшләтә юҡҡа сығарҙы.

Белеүегеҙсә, сирекфиналда Көн­сығыш конференцияһының дүрт командаһы Көн­байыштың дүрт ко­мандаһы менән уйын­дарҙы баш­ланы ла инде. Әлегә осра­шыу­ҙарҙа 3:1 дөйөм иҫәбе менән «Көнсы­ғыш»тар алға сыҡты. Беҙҙе бигерәк тә Урал зонаһы клубтары шәп һөҙөмтәләре менән ҡыуандыра.
Ағайлы-ҡустылы ике туған Ни­колай һәм Алексей Заварухин­дарҙы, тренер булараҡ, быйылғы миҙгелдең асышы, тип әйтергә мөмкин. Тәү­геһе Екатеринбургтың «Ав­то­мо­билист» командаһын етәк­ләп, Санкт-Петербургтың еңелеү белмәҫ СКА-һын ике осрашыуҙа ла уның боҙонда еңеүгә килтерҙе.
Икенсеһе – Силәбе «Трактор»ы­ның «ба­шы» беҙҙең «Салауат Юла­ев»ты Кубок өсөн алыштарҙан тө­шөрөп ҡалдырыу ғына түгел, Мәс­кәүҙең «Динамо»һын егеттәре ме­нән өс уйында ла ыһ та итмәй еңде.
Ут күршебеҙ – Магнитогорскиҙың бер нисә тапҡыр Гагарин Кубогын яулаған «Металлург»ы Андрей Разин етәкселегендә быйыл да һынатмай – ярымфиналда Мәскәү­ҙең «Спартак» командаһын ике уйында ла ҡоро иҫәпкә тар-мар итте.
Хоккей һөйөүселәрҙе лә, бел­гес­тәрҙе лә шулай уҡ хайран ҡал­дырған команда – Ярославлдең «Локомо­тив»ы. Хәтерегеҙ­ҙәлер, 2011 йыл­дағы авиаһәләкәттә тимер юл­сы­ларҙың командаһы тулыһынса һәләк булып, ҡала хоккейһыҙ ҡал­ғайны. Шөкөр, клуб етәкселеге үҙ тәр­биәләнеүселәренән өр-яңы ко­манда туплап, ул йылдан-йыл уйынын яҡшырта килеп, бөгөн Ярославлдең элекке данын ҡай­тарырлыҡ кимәлгә күтәрелде.
«Локомотив» ярымфиналдың тәү­ге уйынында еңеп, икенсеһендә «Авангард»ты 7:0 иҫәбенә ҡый­ратты. Һөҙөмтәлә Омск хоккей клубы етәкселеге ошо уңыш­һыҙ­лыҡтан һуң «Авангард»тың баш тре­неры Михаил Кравецты ва­зи­фаһынан бушатты.
20 мартта «Трактор» менән «Ди­намо» өсөнсө уйынды үткәреп, мәс­кәүҙәрҙе 3:2 иҫәбе менән еңеп, төп призға елле аҙым яһаны, «Локомо­тив» «Аван­гард»ҡа овертаймда 2:1  иҫә­бенә еңелде.
Кисә «Автомобилист» менән СКА, «Спартак» менән «Металлург» ос­рашты.
Бөгөн, «Трактор» менән «Дина­мо», «Локо­мотив» менән «Авангард» уйнай, иртәгә «Автомобилист» ме­нән СКА, «Спартак» менән «Ме­таллург» осраша. 
Ошо уйындарҙан һуң төп Кубокка ҡайһы команданың нығыраҡ ын­тылғаны асыҡ­ланасаҡ та инде. 

Бәхил бул, тренер!

«Салауат Юлаев»тың тренеры Константин Кольцов Аме­рикаға һөйгән ҡыҙы – белорус тениссыһы Арина Собо­ленко менән осрашыу һәм уны Ма­йамиҙағы ярыштарҙа ҡе­үәтләү өсөн барып, 18 март төнөндә шунда вафат булған. Үлем сәбәбе – көтмәгәндә тромбы өҙөлгән, тиелгән.
Кольцов Минскиҙа тыуған. «Юность» хоккей мәктәбе тәрбиәләнеүсеһе. 1998 йылға тиклем балалар, үҫмерҙәр һәм йәштәр командаларында уйнай. Илдең йыйылма командаһы составында 2002 йылда Солт-Лейк-Ситиҙа һәм 2010 йылда Ванкуверҙа уҙған Олимпиадаларҙа ҡат­наша. йәш спортсы КХЛ менән НХЛ клубтарында ла үҙен һынай. Рәсәйҙең конти­ненталь хок­кей лигаһының  «Северсталь» (Череповец), «Металлург» (Новокузнецк), «Аҡ барс» (Ҡазан), «Спартак» (Мәскәү), «Атлант» (Мәскәү яны), «Са­лауат Юлаев» (Өфө) коман­даларында, Белорус­сияның «Динамо» клубында ла уйнай.
2011 йылда Өфө клубы составында Гагарин Кубогын яулай.
2016 йылда белорус егете спорт карьераһын тамамлап, тренерлыҡ эшенә тотона. Үҙ иленең «Динамо» ко­мандаһында ассистент була, «Брест», «Динамо-Мо­лодечно» командаларын етәкләй. Өс йыл Мәскәүҙең «Спартак» командаһының тренерҙар штабында тәж­рибәһен арттырғандан һуң, «Салауат Юлаев» коман­даһына һөжүмселәрҙе әҙерләүсе тренер итеп саҡырыла.
Бәхил бул, тренер! 

Ә. ХЫЗЫРОВА.