«Трактор» «Салауат»ты «иҙҙе»

йәки Көткән өмөттәр ниңә аҡланманы? 

Их, булмағас булмай икән йүкәлә сәтләүек!  Рәсәй хоккей лигаһының даими чемпионатында көнсығыш конференцияла өсөнсө урында тамамлаған «Салауат Юлаев» командаһы күрше Силәбе өлкәһенең «Тракторы»на хәл иткес һуңғы уйында 2:4 иҫәбенә еңелеп, плей-оффтың сирекфиналынан уҡ төшөп ҡалыр, тип бер кем дә уйламағандыр. «Йәшел дружина»ның ысын көйәрмәндәре аҙаҡҡаса мөғжизәгә ышанды: еңелеп барғанда ла ихтыяр көсөн туплап, ул нисәмә уйында нисә тапҡыр Еңеү атының башын үҙ яғына ҡайыра ине. 

Ә бит былтыр октябрь айында тап өфө­ләргә даими еңелгәне өсөн күр­ше­лә­ребеҙҙең баш тренеры Әнүәр Ғәтиә­тул­линды вазифаһынан бушаттылар. Урынына «Трактор» хоккей клубы тәрбиә­ләнеүсеһе, уның ярҙамсыһы Алексей Заварухинды ҡуйҙылар. Яңы «баш» ҡуйылһа ла, чем­пионатта беҙҙекеләр «трактор»сы­ларҙы ыһ та итмәй еңеп килде. Шуға плей-оффтың тәүге раундында уларҙы еңел генә үтерҙәр кеүек тойолғайны. «Регу­лярка»ла биш уйында ҡапҡабыҙҙы «ҡоро» тотҡан ҡим­мәтле ҡапҡасыбыҙ Александр Самонов та, ҡыҙғанысҡа ҡаршы, иң кәрәкле мәлдә ышанысһыҙ уйнаны. Шулай булмаһа, ике шайбаға өҫтөнлөктө юғалтыуҙы нисек аңларға? Иван Дроздов, Джош Ливо, Алек­сандр Хмелевский кеүек һәр уйында гол индергән бомбардир­ҙарыбыҙ ҙа тырышты, әлбиттә. Уларҙың звеноһына рәхмәттән башҡа һүҙ юҡ. Ә башҡа егеттәребеҙҙең күпселеге тигеҙ уйнаманы.
Мәҫәлән, тәүге ике звенола уйнарға тейешле Данил Алалыкин, Сергей Баш­киров, Алексей Пустозеров кеүек йәштәр уйындан-уйынға оҫтарып, командабыҙға һөҙөмтә килтерергә тейеш ине. Улар үҙ­ҙәренә ҙур ышаныс күрһәткән клуб етәк­селегенең дә, көйәрмәндәрҙең дә ыша­нысын аҡламаны.
Данил Алалыкин 40 уйында – 3, Сергей  Башкиров 64 уйында – 9 тапҡыр ҡаршы команданың ҡапҡаһын «сылатһа», Алексей Пус­то­зеров бер шайба ла индермәне. Күпселектә боҙға сыҡҡан был өсәүҙең бөтәһенә 12 гол бик әҙ, минеңсә. Өфөлә икенсе йыл уйнаған 37 йәшлек Николай Кулемин, йәғни «ҡартлас», был миҙгелдә 13 гол индереп, уларҙы уҙып китте. 
Ҙур өмөт бағланған Александр Шаров, Матвей Гуськов һәм Вячеслав Лещенко ла «Салауат»тың уйынына «ут» өҫтәргә тейеш ине. Был егеттәрҙән Саша ғына тырышты, тик быйыл голдарҙы былтырғыһынан унауға әҙерәк индерҙе. Ә инде ҡалған икәүһенең потенциалын күрмәнеләрме, улар миҙгел башында күренде лә аҙаҡ уйындарҙа ҡатнаштырылманы.
Шулай  уҡ, «Спорт-экспресс» яҙыуынса,  миҙгеленә 60 миллион һум эш хаҡы алған иң ҡиммәтле һаҡсыһы Михаил Науменков та әллә ни ҡы­уан­дырманы. Һаҡсының бурысы дәғүә­сенең ­һөжүмселәрен ҡапҡаға яҡынлатмау, мөм­кинлегенә ҡарап, иптәштәренә пас би­реүҙән һәм гол индереүҙән ғибәрәт. Ә ул, киреһенсә, «Трактор» менән хәл иткес бишенсе осрашыуҙа, кәрәкмәгәндә хата­ланып, был күршеләрҙең беҙҙекеләр ҡап­ҡаһына еңеү шайбаһы индереүенә килтерҙе. 
Үҙҙәре элекке хоккейсылар булған тренерҙар штабына ла дәғүә бар. Ниңәлер ике миҙгел рәттән юлаевсылар күпселектәге уйынын рәтләй алмай. Дәғүәсе ҡапҡаһына туҡтауһыҙ һөжүм итһәләр ҙә, һөҙөмтә юҡ. Был да бик уйландыра. 
Көнсығыш конференцияһында даими чемпионатты былтыр икенсе урында та­мамлап, шулай уҡ плей-оффтың сирек финалында «Адмирал»ға әлеге лә баяғы 2:4 иҫәбенә еңелеп, быйыл да тәүге раундта төшөп ҡалған командабыҙ 13-сө йыл инде аҫҡа тәгәрәгәндән-тәгәрәй. Бында төп ғәйеп уйынсыларҙа ғына түгел. Төп ғәйеп – республикабыҙҙың төп командаһының эшмәкәрлеген тейешенсә ойоштора ал­маған клуб етәкселегендә. Былтырғы уңышһыҙ­лыҡтан һуң «Салауат Юлаев» хоккей клу­бының генераль директоры Ринат Бәширов, команданы туплау бара, был миҙгел күсеү осоро, тип көйәрмәндәрҙе тыныслан­ды­рырға тырышты. Былтыр июлдә иһә: «Команда миҙгел башына тулыландырылды, беҙ көсәйҙек, күп нәмәне иҫәпкә алдыҡ», – тип тә белдергәйне. Ниңәлер, «күсеү осоро» улар теләгәнсә килеп сыҡманы. Быға өфөләрҙең дүрт йыл генераль менеджерһыҙ эшләүе лә бу­лыш­лыҡ иткәндер. Тап ошо кәрәкле вазифаның бөтөрөлөүе төп составҡа уйынсылар эҙләп, команданы туплағанда ла, башҡа ойош­тороу эштәрен башҡарғанда ла үҙен һиҙҙерҙе. 
Республикабыҙҙың милли геройының исемен йөрөткән, 60 йыллыҡ тарихы булған «Салауат Юлаев»тың йылдан-йыл мәс­хәрәгә ҡалыуында аҡса мәсьәләһе лә төп урынды биләй. Үҙәк спорт каналдары һәм баҫмалары хәбәр итеүенсә, «Роснефть» компанияһы «Башнефть» компанияһын «йотҡандан» һуң, мәскәүҙәр клубты фи­нанслауҙы йыл да һиҙелерлек ҡыҫҡарта  һәм тотҡарлай икән.  Хоккей­сыларға аҡса плей-офф башланғас ҡына өлөшләтә күсерелгән. Буштың атаһы үлгән, тип юҡҡа әйтмәйҙәр. Тейешле аҡсаны ҡасан күсереүҙәре билдәһеҙ бул­ғанда, бер ниндәй команданың да артыҡ ныҡ тырышмаясағы көн кеүек асыҡ. 
Плей-офф уйындары башланыр саҡта Ринат Бә­широв республика Башлығы менән миҙгел алдынан булған һөйләшеүҙе иҫенә тө­шөрөп: «Мин Радий Хәбировҡа, хәҙер Козловты ебәреү ғәҙел булмаясаҡ, әгәр ул был миҙгелдә йөкмәтелгән бурысты үтәмәһә, шунда ебәрербеҙ, тинем. Башлыҡ: «Һине лә», – тип өҫтәне», – тигәйне.
Күрәһең, бөгөн тап шундай көн етте. Командабыҙға белдекле генераль директор һәм генераль менеджер ҡуйылырға тейеш. Һәм тап шундай ысын профессионалдар килеп, яңы тренерҙар штабын саҡырһа, миллион һумдар түләп тә файҙаһы тей­мәгән уйынсыларҙы ебәреп, составты яңыртһа, үткән миҙгелдәге хаталарҙы анализлап, уларҙан һығымта яһаһа һәм  мәскәүҙәр менән уртаҡ тел табып, фи­нанслау мә­сьәләһен хәл итһә генә, ко­мандабыҙҙы түбәнгә төшөүҙән һәм тар­ҡалыуҙан ҡотҡарасаҡбыҙ.
Әйткәндәй, Башҡортостан көйәрмән­дәре, клуб етәкселеген һәм тренерҙар штабын отставкаға ебәреүҙе талап итеп, икенсе тапҡыр республика етәкселегенә петиция яҙған. Унда: «Был кешеләр был вази­фа­ларҙы биләргә һәм бай тарихлы клуб менән етәкселек итергә тейеш түгел», – тиелә. Дөрөҫ һүҙгә яуап юҡ. 
Башҡа коман­даларға килгәндә, Татарстандың «Аҡ барсы» – Екатерин­бургтың «Автомобилисы»на Мәс­кәүҙең ЦСКА-һы – Ярославлдең «Локо­мо­тив»ына, Минскиҙың «Динамо»һы – Мәс­кәүҙең «Динамо»һына, Череповецтың «Север­стал»е – Мәскәүҙең «Спартагы»на, Хабаровскиҙың «Амур»ы – Магнитогор­скиҙың «Металлургы»на, Түбәнге Новго­родтың «Торпедо»һы СКА-ға еңелеп, беҙ­ҙекеләр кеүек, тәүге раундта уҡ  төшөп ҡалды.
16 мартта А төркөмөндә «Динамо» (Мәскәү) менән «Трактор» (Силәбе), «Аван­гард» (Омск) менән «Локомотив», 17 мартта Б төркөмөндә «Металлург» (Магни­тогорск) менән «Спартак» (Мәскәү), СКА (Санк-Петербург) менән «Автомобилист» (Екате­ринбург) ярымфинал уйындарын башлай.
Беҙгә күршеләрҙең командалары өсөн «кө­йөргә» генә ҡала.

Ә. ХЫЗЫРОВА.