Әлегә барыһы ла һәйбәт

Ҡаҙағстандан ҡайтышлай, «Салауат Юлаев» Новосибирскиҙа туҡталып, «Себер» командаһы менән осрашты. Әйтергә кәрәк, был – Өфөләрҙең уның менән өсөнсө осрашыуы. Былтырғы ике уйында беҙҙекеләр ыһ та итмәй еңгәйне. Был юлы ла юлаевсылар һынатманы – тәүге осорҙоң 28-се секундында уҡ Иван Дроздов тәүге шайбаны индереп тә ҡуйҙы. Шәп бомбардирыбыҙ Александр Хмелевский беренсе осор бөтөп барғанда иҫәпте арттырҙы.

Икенсе осорҙа «Себер» егеттәре үҙ уйынын таҡты. Һөҙөмтәлә Тэйлор Бэк менән Владимир Михалев иҫәпте тигеҙләне.
Өсөнсө осорҙа хужаларҙың әҙселектә булыуын файҙала­нып, Александр Шаров бик кәрәкле шайбаһы менән ко­ман­да­быҙҙы алға сығарҙы. Һәр уйында һөҙөмтә күрһәткән легионерыбыҙ Николя Милош дүртенсе – еңеү шайбаһын индерҙе.
«Йәшел дружина» дүрт уйы­нын ситтә үткәреп ҡайтҡандан һуң, 21 ғинуарҙа «Амур» ко­мандаһы менән осрашты. Алыҫ Көнсығыш командаһы турнир табли­ца­һында унынсы урында килһә лә, КХЛ-дың топ-ку­боктары уйынсыларына ныҡлы ҡаршылыҡ күрһәтеп, ҡайһы саҡта уларҙы еңә лә. Был юлы ла ул беҙҙекеләргә ҡаршы лайыҡлы уйнаны. Тәүге осор­ҙоң башында Станислав Бо­чаров һауығып боҙға сыҡҡан Александр Самонов ҡапҡаһына бик тиҙ генә шайбаны со­йорғотто.
Хужалар дәғүәсе ҡапҡаһы янында туҡтауһыҙ өйөрөлә торғас, 33-сө минута Николя Милош саҡ иҫәпте тигеҙләне. Ҡунаҡтар ҙа бирешергә телә­мәне. Өсөнсө осор барышында әлеге лә баяғы Станислав Бо­чаров йәнә уңышҡа өлгәшеп, коман­даһын алға сығарҙы. Өсөнсө осор уртаһында Алек­сандр Шаров индергән шай­банан һуң, уйын овертаймда дауам итте. Унда инде юла­евсыларҙың тренерҙар штабы өҫтәмә ваҡытта гел ҡулланған ысулды һайланы – һаҡсыбыҙҙы уйынсыға алмаш­тырҙы. Был үҙен аҡланы, уйын башланып ике минут та үт­мәне, Джошуа Ливо индергән шайба коман­дабыҙға ике мә­рәй килтерҙе.
Ошо уйында «Салауат Юла­ев»тың һаҡсыһы Евгений Би­рюков КХЛ тарихында меңенсе матчын үткәргән уйынсы бу­лараҡ билдәләнде. Ул карье­раһында «Металлург» коман­даһы өсөн – 779, Өфө клубы составында 221 уйында ҡат­нашҡан. 37 йәшлек спортсы күршеләребеҙ командаһы ме­нән ике тапҡыр Гагарин ку­богын яулай. Ә Башҡор­тос­тандың төп командаһына 2020 йылда саҡырыла. КХЛ уйын­дарында бөтәһе 148 мәрәй (24 шайба + 124 пас) йыйған.
юлаевсылар Алыҫ Көнсығыш турнеһын «Амур» менән осрашыуҙан башланы.  Тәүге осорҙа – Ян Дрозг, икенсеһе башында Дмитрий Шевченко, беҙҙең ҡапҡаға ике шайба индереп алға сыҡты. Джошуа Ливо был юлы ла мәргәнлеген иҫбатлап, иҫәпте ҡыҫҡартты. Төп ваҡыт бөтөүгә ике секунд ҡалғас, Александр Хмелевский иҫәпте тигеҙләп, уйын овер­таймда дауам итте. Унда ике команда ла уңышҡа өлгәш­мәне. Һөҙөмтәлә буллиттар серияһында Джошуа Ливо гол индереп, командабыҙға еңеү килтерҙе.
Бөгөн өфөләр йәнә «Амур» менән уйнай. Ә 28, 29 ғинуарҙа иһә Владивостокта «Адмирал» менән осрашасаҡ.
Башҡа командаларға кил­гәндә, «Северсталь» «Метал­лург»ҡа 2:3 иҫәбенә отолоп, ете уйындан торған еңеүле се­рияһын өҙҙө. «Магнитка» иһә 78 мәрәйе менән Көнсығыш конференцияһында ла, дөйөм турнир таблицаһында ла тәүге урында килә. Унан бер мәрәйгә ҡалышҡан «Авангард» – икен­се, 72 мәрәй йыйған «Салауат Юлаев» өсөнсө урында.

Ә. ХЫЗЫРОВА.