Бөтә яңылыҡтар
Мәғариф
16 Декабрь 2022, 11:11

Мәғариф һәм фән министры Берҙәм һәм төп дәүләт имтихандарын уҙғарыу ваҡытын атаны

2023 йылда Берҙәм дәүләт имтиханын ваҡытынан алда тапшырыу осоро - 20 марттан 19 апрелгә тиклем, төп осор - 26 майҙан 1 июлгә ҡәҙәр, өҫтәмә осор - 6 сентябрҙән 19-ына тиклем дауам итә.

Мәғариф һәм фән министры Берҙәм һәм төп дәүләт имтихандарын уҙғарыу ваҡытын атаны
Мәғариф һәм фән министры Берҙәм һәм төп дәүләт имтихандарын уҙғарыу ваҡытын атаны

26 майҙа география, әҙәбиәт һәм химия буйынса һынауҙарҙың төп осоро асыла. Информатика һәм мәғлүмәт-коммуникация технологиялары буйынса Берҙәм дәүләт имтиханын, шулай уҡ сит телдәр буйынса имтихандың «Һөйләшеү» бүлеген уҙғарыу өсөн икешәр көн ҡаралған. Сит телдәр буйынса «Һөйләшеү» бүлеген – 16 һәм 17 июндә, информатика һәм мәғлүмәт-коммуникация технологиялары буйынса БДИ-ны 19 һәм 20 июндә үткәреү планлаштырыла. Беренсе мотлаҡ фәнде, рус телен, сығарылыш уҡыусылары 29 майҙа тапшыра. База һәм профилле кимәлдәге математика буйынса икенсе мотлаҡ имтихан бер көндә – 1 июндә үтәсәк.

Тарих һәм физика буйынса имтихандар – 5 июндә, йәмғиәтте өйрәнеү фәненән Берҙәм дәүләт имтиханы – 8 июндә, биология һәм сит телдәрҙән яҙма өлөш 13 июндә уҙғарыла.

Туғыҙынсы кластар өсөн төп дәүләт имтиханын уҙғарыу ҙа өс осорға бүленгән: ваҡытынан алда (21 апрелдән 16 майға тиклем), төп (24 майҙан 1 июлгә ҡәҙәр) һәм өҫтәмә (4 сентябрҙән 23-нә тиклем). 2023 йылғы имтихан кампанияһының төп осоро 1 июлдә тамамлана. Мәғариф һәм фән министры Берҙәм дәүләт имтиханында ҡатнашыуға ғаризаны – 2023 йылдың 1 февраленә, төп дәүләт имтиханында 2023 йылдың 1 мартына тиклем бирергә мөмкин булыуын иҫкә төшөрҙө.

 

 

Фото: Т. АМАНОВ.

 

Автор:Гөлназ Шәйхетдинова
Читайте нас: