Сәләмәтлек акциялары ауырыуҙы ваҡытында асыҡларға ярҙам итә

Радий Фәрит улы: «Беҙҙең бу­рыс – медицина ярҙамын юғары сифатлы  һәм һәр кемгә асыҡ итеү, шул иҫәптән респуб­ликаның иң алыҫ ауылдарында йәшәүселәргә лә», – тигәйне.   Ошо маҡсаттан сығып, «Сәлә­мәтлек поездары» республи­ка­ның төрлө районына   барып, ауыл халҡына медицина тик­шереүе үткәрә һәм беренсел медицина ярҙамы күрһәтә. 
«Сәләмәтлек поездары» йыл һайын  апрелдән сентябргә тиклем алты маршурт буйынса республика буйлап сәйәхәткә сыға. Республика дауаханаларынан терапевт, кардиолог, невролог, хирург, педиатр, офтальмолог, стоматолог, эндокринолог кеүек юғары квалификациялы бел­гестәр кешеләрҙе ҡабул итеп, медицина тикшереүе үткәрә,  улар­ға һаулығын нығытыу буйынса кә­ңәштәрен бирә,   дауаланыу курсы тәғәйенләй.    Ғ. Ҡыуатов исе­мендәге Республика клиник дауаханаһының, Республика кардиология үҙәгенең диагностика үҙәктәре, күсмә сәләмәтлек үҙәктәре, флюорографтар, маммографтар, ФАП-тар, «Ҡатын-ҡыҙ сәләмәтлеге» модулдәре үҙ хеҙмәтен тәҡдим итә. Медицина тикшереүе бушлай үткәрелә, ҡабул итеү – сират буйынса. Паспорт менән медицина полисы ғына кәрәк.
Был акция, ысынлап та, дауа­ханаға йөрөргә яратмаған ауыл халҡы өсөн бик уңайлы. Берҙән,  бер юлы бер нисә табип­ҡа күренергә мөмкин, икенсе­нән, медицина тикшереүенең һө­ҙөмтәһе лә шунда уҡ билдәле була.  Өҫтәүенә, алдан яҙылырға ла кәрәкмәй.  Һәм тағы ла иң мөһиме – өҫтәмә тикшерелеү үтергә кәрәк булһа, шунда уҡ республика дауаханаларына йү­нәлтмә бирәләр. 
2023 йылда «Сәләмәт республика – сәләмәт төбәк» акцияһы барышында республика медиктары   316 ауылда булып, 150 190 кешене ҡараған,  40 796 медицина тикшереүе үткәргән һәм 22 012  ауырыуҙы асыҡлаған. 
Быйыл  акция алтынсы тапҡыр ойошторолдо.   Ул  башланғандан алып  белгестәр 150 меңгә яҡын  кешене ҡабул иткән, 35956 медицина тикшереүе үткәргән.  
Медицина тикшереүе һөҙөмтә­һендә 3 650 пациентта шәкәр кимәленең, 4480 кешелә – холестериндың, 5871 кешелә ҡан баҫымының  юғары булыуы, 5732 кешелә артыҡ кәүҙә ауырлығы булыуы  асыҡланған.     Шулай уҡ табиптар    3487 социаль әһәмиәтле ауырыуға шик булыуын билдәләгән.  Тикшереүҙәр   172 пациентта яман шеш, 629 кешелә  шәкәр диабеты  булыу  ихтималлығын күр­һәткән. 
Ниндәйҙер ауы­рыу­ға шик тыуған йәки диагноз  асыҡ­лан­ған осраҡта  артабан тикшерелеү үтеү һәм дауаланыу өсөн  республика медицина учреждениеларына йүнәлт­мә  би­релгән. 
– Баймаҡ райо­нын­да «Сәлә­мәтлек поездары»  быйыл 16 июлдән 31 июлгә тиклем эшләне. Был юлы улар Байыш, Ишмө­хәмәт, Күл­та­бан, Сосновка, Октябрь, Урғаҙа, Урал ауылдарында халыҡты ҡабул итте. 
Белгестәр районда эшләгән ваҡытта  төпкөл ауыл кешеләре медицина тикшереүе үтеү һәм квалификациялы ярҙам алыу мөмкинлегенә эйә булды. Акция барышында терапевт– 482, хирург – 271, педиатр – 465, акушер-гинеколог – 239, кардиолог – 634, онколог –  88, офтальмолог – 413, невролог –  684, стоматолог – 148, эндокринолог 513 кешене ҡабул итте. Шулай уҡ 464 пациентҡа УЗИ тикшереүе, 801 кешегә флюорография,  380  ҡатын-ҡыҙға маммография үт­кәрелде. Һөҙөмтәлә 108 тәүге тапҡыр асыҡланған ауырыу билдәле булды. Акцияла ҡат­нашыусы табиптарҙың ауы­рыуҙарға иғти­барлы мөнәсәбәте, профессиональ хеҙмәте өсөн ҙур рәхмәт, – ти Баймаҡ үҙәк район дауа­ханаһының баш табибы Илшат Ырыҫҡужин.   
«Сәләмәт республика – сәләмәт төбәк» акцияһы   халыҡ   араһын­да йылдан-йыл популярлыҡ яулай бара.   Һәр кем уны көтөп алып, Өфө табиптарына күренеп ҡалырға тырыша. 
– Беҙҙең ауылға  Өфө табиптары килгәндә, тотош ғаилә менән барып күрендек. Унда кардиолог, невролог, гинеколог һәм башҡа табиптар килгәйне. Флюорография, УЗИ үттек. Әлбиттә, ныҡ уңайлы.   Анализдар  бирҙек, һөҙөмтәһе лә шунда уҡ әҙер булды. Мин, мәҫәлән, Өфөнән килгән кардиологҡа күренгәндә, ныҡ һәйбәт итеп ҡараны, ниндәй тикшерелеү үтергә, дарыуҙар эсергә әйтте, – тип һөйләй Баймаҡ районынан Минзилә апай. – Йышыраҡ килһендәр инде, ҡайһы бер райондарҙа улар бигерәк йыш була.  
«Сәләмәт республика – сәләмәт төбәк» акцияһы быйыл 15 сентябргә тиклем дауам итә. 

Сажиҙә ЛОТФУЛЛИНА.