Әммә ул, нисек кенә яҡшы булмаһын, һәр кемгә лә файҙалы, тип әйтеп булмай. Шифалы мунсаны үҙ белдегегеҙ менән зыянға әйләндереп ҡуймағыҙ.
Мунсаны әллә нигә бер инеп кенә һауығып булмай. Сынығыу һәм сәләмәтләнеүгә килтергән башҡа ысул кеүек үк, ул да даимилыҡты (аҙнаһына 1 – 2) һәм тәүге осорҙа һаҡ эш итеүҙе талап итә. Һүҙ уңайынан шуны ла әйтергә кәрәк: йәмәғәт (дөйөм) мунсаларында дауаланыу бик ауыр. Эш шунда: унда эҫелектән, пар һәм дымдан тыш, саф һауа ла булырға тейеш. Ә белеүегеҙсә, бетон стеналар һуламай. Әгәр дөйөм мунсала насар, дымлы еҫ бар икән, унда бөтөнләй сабынырға ярамай.
Мунса инеү 2 – 3 сәғәткә һуҙылырға тейеш. Йыуыныу, парланыу, ҡойоноу, сабыныуҙан тыш, ял бүлмәһендә үлән сәйҙәре эсегеҙ, хуш еҫле майҙар менән тәнегеҙҙе ыуығыҙ. Миндек тураһында ла онотмағыҙ: уны аҙна һайын алыштырып тороғоҙ: бер аҙнала – ҡайын, икенсеһендә – имән миндек һәм башҡалары.
Тән ҡыҙғанда, туберкулез, яман шеш, флебит ауырыуы булғанда, ҡалҡан биҙе эшмәкәрлеге боҙолғанда, эҫе мунса инеү тыйыла. Шулай уҡ психик (күңел төшөнкөлөгөнә бирелгәндә, ярһығанда, эпилепсия) һәм хроник ауырыу ваҡытында, көслө йоғонтоло дарыуҙар ҡулланғанда мунса зыян итәсәк. 3 йәшкә тиклемге балаларға һәм 70 йәштән уҙған ололарға ла бик һаҡ булырға кәрәк. Ғөмүмән, табипҡа күренгән саҡта мотлаҡ мунса инеү буйынса кәңәшләшегеҙ.
Мунса ҡан тамырҙарына яҡшы йоғонто яһай. Мәҫәлән, ҡан баҫымы күтәрелеүҙең 1-се дәрәжәһе күҙәтелгәндә, мунса инеү файҙаға ғына. Әммә сәләмәтлеккә зыян килтермәҫ өсөн түбәндәге табип кәңәштәренә ҡолаҡ һалыу мөһим:
– йөрәк тибешен һәм ҡан баҫымын тикшереп торорға,
– оҙаҡ сабынмаҫҡа,
– йүкә миндегенә өҫтөнлөк бирергә,
– үлән сәйҙәре эсергә.
Оҙайлы сир ваҡытында мунса менән һаҡ булығыҙ. Үҙегеҙҙе аҙ ғына насар тойғанда ла, хәлһеҙләнгәндә лә тиҙерәк сыға һалырға, бик булмаһа, ишекте асырға кәрәк. Тағы ла эҫенең организмды ярһытыуын иҫтән сығармағыҙ. Шуға күрә йоҡларға ятыр алдынан кәм тигәндә бер сәғәт алда был процедураны тамамлағыҙ. Әгәр дауаланыу өсөн еҫле майҙар, тоҙ ҡулланырға теләһәгеҙ, көндөң беренсе яртыһында мунса инегеҙ.
Ас ҡарынға йәки, киреһенсә, күп ашағандан һуң, эшләп арығас оҙаҡ сабынырға ярамай. Сөнки мунсаның сәләмәтлеккә һөҙөмтәле йоғонтоһо булһын өсөн хәл дә кәрәк. Кеше ни өсөн мунса инә? Тәү сиратта таҙарыныу өсөн. Шулай уҡ шлактарҙан арыныу, ауырыуҙарға ҡаршы көрәшеүсе мөмкинлектәрҙе асыу, көс-дәрт алыу өсөн дә инә. Бының өсөн рәхәтләнеп парланырға, сабынырға, тәнде ышҡырға кәрәк. Әгәр быларҙы эшләргә ваҡытығыҙ йәки кәйефегеҙ юҡ икән, мунсаны кисектереп тороғоҙ.
Мунса – бынамын тигән сынығыу сараһы. Ул көн торошо үҙгәрешенә үтә һиҙгер кешеләргә бигерәк тә ыңғай йоғонто яһай. Йылылыҡтың, баҫымдың үҙгәреше ҡан тамырҙарын яҡшы сыныҡтыра. Үпкә һәм тын юлдары ауырыуҙары менән интегеүселәр ҙә мунсанан шифа аласаҡ. Андыҙ, бесәй борсағы, кейәү үләне, аҡсәскә, мәтрүшкә, бөтнөк, бесәй борсағы (просвирник), кесерткән кеүек дарыу үләндәрен бешереп, быуын еҫкәү өҫкө һулыш юлдарының лайлалы тышлығын нығытасаҡ. Йоҡоһоҙлоҡтан интеккәндә, борсолоулы саҡта ла мунса ярҙамға киләсәк.
Тик мунса ярҙамында һаулығығыҙҙы нығытыр алдынан уның ниндәй осраҡта файҙалы, ә ҡайһы саҡта зыянлы булыуын ныҡлы өйрәнегеҙ. Һәм, әлбиттә, табип менән кәңәшләшегеҙ.