+10 °С
Облачно
Һаулыҡ һаҡлау
9 Декабря 2019, 07:55
Яҙмышығыҙҙы үҙгәртеү үҙегеҙҙән генә тора
“Уйлана-уйлана баш ҡатты инде. Ир инде проблемам... Ғүмеремде уйлап, уның менән айырылышыр булдым, тик был хаҡта балаларға әйтә алмайым. Балаларыбыҙ өсәү: 21, 15, 8 йәштәләр. Ир тигәнең үҙе һәйбәт кеше, эсһә, белеп эсә, вахтала эшләй, кешегә һәйбәт, донъя ла көтә, күпләп мал аҫрайбыҙ. Ҡышҡыһын уларҙы ҡараша. Ә йәй буйы мал ҡарау минең елкәлә, баҡса, ҡош-ҡорт, донъя мәшәҡәттәре күп. Шуға ла риза булмай китә. Яҙһаң, күп инде. Китһәм, билләһи, кеше, был бисә шашҡан, тип әйтәсәк! Мине һанға һуҡмай, йәш ваҡытта хатта ҡул күтәргеләне. Ә иң ҡыйыны – хыянат! Арыным, арыным шунан, көрәшеп арыным. Нервыларым ҡаҡшап, әсәкәйемә ҡайтып бағындым, әҙерәк рәткә килеп, кире ҡайттым. Алйып йөрөйөм инде. Ете йыл ваҡыт үтте, өйҙә тыныслыҡ юҡ. Онотормон, тинем, ә нәфрәтем йылдан-йыл көслөрәк була бара. Ирем менән бергә ята алмайым, бысраҡ һымаҡ ул миңә. Алдай, кеҫәһендә трусиктар ҙа алып ҡайтҡаны бар. Телефонын йәшерә. Мин йоҡо бүлмәһенә инһәм, сығып, йәшереп килә. Йәшенеп һөйләшә, тотолһа, әллә нишләп китә, әйтһәң, аҡыра! Ә бит тыныс йәшәге килә. 45-кә етеп барыла бит, уға 45 йәш тулды. Нервым бөттө, йөрәгем ауыртҡылай башланы. Саҡ ҡына бер нәмә өндәшһә, бер ҡайҙа китһә, ҡалтыранам, үҙемде тота алмайым... Йәшерәк ваҡытта муйыныма бау ҙа һалдым, бер дарыу ҙа ашаным – Аллаһы Тәғәлә балаларым хаҡына үҙе аралағандыр инде. Күп күрҙем ул ирҙән, түҙер әмәлем ҡалманы. Әлфинә”.
Ошондай йөкмәткеле хат килеп төштө. Был темаға былтыр яҙып сыҡҡайным инде. Шулай ҙа хыянат темаһы актуаллеген юғалтмай, килешәһегеҙме? Һәм бер ҡасан да юғалтмаясаҡ. Быныһын инде белгес булараҡ әйтә алам. Әлфинәнең хатында, үҙегеҙ иғтибар иткәнһегеҙҙер, бер нисә тапҡыр “арыным” тиелә. Оҙайлы ваҡыт көсөргәнешле күңел кисерештәре, үпкә, асыу кисергән кешеләргә ошолай “хәл бөтөү”, йәғни эмоциональ яныу (выгорание) хас. Һәм тағы ла “ҡорбанға” әһәмиәтле кешеһе яғынан психологик баҫым яһала икән (исем тағыу, кәмһетеү, эштәрен, кейемен, кәүҙә-йөҙөн тиҫкәре баһалау), бындай ғаилә мөнәсәбәттәренең ни менән бөтөрөн күҙаллауы ла ҡыйын. Шулай ҙа, тәжрибәмдән сығып, был хәлгә анализ яһай алам. Ысынбарлыҡта иһә был хәлдә тик ике генә юл бар:
1. Түҙәм! (Был ҡарар өсөн дә сәбәптәре табыла) – ирҙең хыянаттарына, ҡуптарған иреш-талаштарына күҙ йомоу. Балаларҙы ла, атайға бер һүҙ әйтергә ярамай, тип тыйыу. Сөнки ҡатын үҙ-үҙенә ышанмай, киләсәген “ниндәй булһа ла ирем бар әле” тип кенә күҙаллай. Әлбиттә, бындай ҡатындарҙы бала саҡтан уҡ барлыҡҡа килгән комплекстары оҙата килә һәм уға үҙ-үҙен “азат” итер өсөн ныҡ ҡына эшләргә тура киләсәк әле. Үкенескә күрә, тап ошо “үҙ өҫтөңдә эшләү” һирәк ҡатындарҙа килеп сыға.
2. Түҙмәйем! Тормошоң өсөн яуаплылыҡты үҙ өҫтөңә алыу. Бындай мөнәсәбәттә артабан да йәшәп булмаҫын аңлау киҫкен аҙым (ир өсөн инде) яһауға этәргес булырға тейеш. Икенсе, бәхетле тормошҡа һеҙҙең хоҡуғығыҙ бар!
Икенсе вариантты һайлауы ғына еңел. Ә бер нисә йыл буйы көслө заттан кәмһетелеп, үҙенең “эшкинмәгән”легенә ышанған ҡатынға ҡапыл-ғара тормошон ҡырҡа бороу еңелгә тура килмәйәсәк. Әммә тирандан ҡотолғандарҙың йәшәйеше яйға һалыныуы – факт.
Хөрмәтле ханымдар, Әлфинә! Әгәр ҙә үҙегеҙҙең теләгегеҙ булмаһа, бер ниндәй ҙә психолог һеҙгә ярҙам итә алмаясаҡ. Иң беренсе, һеҙ айыҡ аҡыл менән уйлап, аңларға тейешһегеҙ, ни өсөн был хәл килеп сыҡты? Был ситуация миңә ни өсөн бирелде? Иремдең ғүмере өсөн кем яуаплы? Минең бәхетле киләсәгем ниндәй? Йәшәйешемде яҡшыртыу өсөн хәҙер үк нимә эшләй алам? Ҡағыҙ алып, өҫтәге һорауҙарға ғәҙел яуап яҙығыҙ һәм үҙегеҙҙең бөгөнгө халәтегеҙҙе аңларһығыҙ. Тағы ла ябай ғына тест. Шундай уҡ ҡағыҙҙа ирегеҙҙән айырыла ҡалһағыҙ, һеҙҙең ниндәй ыңғай (+) һәм тиҫкәре (–) хәлдәргә тарыуығыҙ ихтимал – барыһын да тәфсирләп яҙығыҙ. Был киләсәгегеҙҙе тағы ла асығыраҡ күҙалларға ярҙам итер.
Фото: пиксбей.ру
