«Йәш кәләш күлдәге эҙләйбеҙ!»

Билдәле блогер Миләүшә Шәйхлисламова туй салонында әхирәтенә күлдәк һайлашҡан. Сәбәбе ғәҙәти түгел: әхирәте дүртенсе тапҡыр кейәүгә сығырға әҙерләнә.

— Матур, ҡабарып торған, сифатлы һәм арзан күлдәк эҙләйбеҙ, — ти  Миләүшә һәм үҙенең тәүге тапҡыр ҡуртымға алынған күлдәктә кейәүгә сығыуын хәтерләй.

Әхирәттәр бик күп варианттарҙы ҡарай: төшөп торған еңле, корсетлы һәм лифында ялтырауыҡлы сигелгән күлдәктәрҙе. Блогер туй яһауҙың арзан иҫәптән булмауын билдәләй. Шул уҡ ваҡытта шаяртыуҙарға ла урын таба.

— Был фата иҙәнгә тейеп, һөйрәлеп барырға тейешме? Кейәүгә сыҡмағанға 100 йыл булды, шуға күрә онотҡанбыҙ, — тип шаярта Миләүшә.

Яҙылыусылары өсөн көтөлмәгәндә ул интрига ла өҫтәп ҡуя.

— Бәлки, мин дә үҙемдең иремә яңынан кейәүгә сығырмын? — ти һәм шунда уҡ 80-се йылдар стилендәге фатаны кейеп ҡарарға теләүен әйтә.

Фатаны башына кейеү менән блогер иреп киткән.

— Ниндәй матур! Ҡыҙҙарҙың аҡ күлдәктән кейәүгә сығырға теләүе юҡҡа түгел. Был хистәрҙе тоймағанға ни тиклем ваҡыт үткән, — ти ул.

Туй салонына барыу уңышлы үтә – блогерҙың әхирәте ҡабарып торған шәп күлдәк һатып алған. Миләүшәнең һүҙҙәренсә, ул күлдәктең хаҡын 20 мең һумдан 10 мең һумға  тиклем төшөрткән.

— Магазинға барһағыҙ, мине үҙегеҙ менән алығыҙ. Кәрәкле әйберҙе бушлай тигәндәй аласаҡһығыҙ. Минең менән йөрөү файҙалы! — ти блогер.