Яҙҙың бер көнө йылды туйҙыра

Әбйәлил районында ла яҙғы сәсеү рәсми рәүештә старт алды.

 Әлеге ваҡытта төбәктә 10 350 гектарҙан ашыу майҙан сәселгән — был дөйөм пландың һәр алтынсы гектары тиерлек. Темптар бик яҡшы, район аграрийҙары һәр аяҙ көндө-сәғәтте тулыһынса файҙаланырға тырыша.

Быйыл Әбйәлил игенселәре уңыш мул булыр тип өмөт итә. Баҫыуҙарға 1 650 гектарҙа төп культура - бойҙай сәселәсәк. Майлы етенгә өҫтөнлөк бирелә: 2 500 гектар, көнбағыш һәм рапс 1 900 һәм 2 000 гектар, борсаҡ 1 000 гектарҙа үҫәсәк. Силосҡа кукуруз 1000 гектарға яҡын буласаҡ.

Район хужалыҡтары йылдың мөһим кампанияһына тулыһынса әҙер, кәрәкле  техника, яғыулыҡ, орлоҡтар менән тәьмин ителгән. 1 474 тонна ашлама һатып алынған.

Аграрийҙарға тотороҡло һауа торошо һәм еңел булмаған эштәрендә уңыштар теләйбеҙ.