Абхазияға тәүге осош уңышлы булды

Өфөлә самолетыбыҙ билдәле хәлдәргә бәйле бер аҙ тотҡарланһа ла, юлыбыҙ бик тиҙ һәм уңышлы булды. Өфөнән Сухумға килеп төшкән тәүе самолетты авиациялағы йола буйынса янғын һүндереү машиналары һыуға ҡойондорҙо. Ә аэропортта яңы рейсты тәүге пассажирҙарын Абхазия Республикаһының вице-премьеры Джансух Нанба менән иҡтисад министры Теймураз Миквабия сәләмләне. "Хәйерле сәғәттә! Был рейстың ғумере оҙон булыр тип ышанабыҙ. Ул рухы менән бер-береһенә яҡын халыҡтарға йышыраҡ осрашырға, йышыраҡ бер-береһенә ҡунаҡҡа йөрөргә мөмкинлек бирә", -- тип улар Башҡортостан Башлығы Радий Хәбировҡа рәхмәт һүҙҙәрен еткерҙе. Һый тулы өҫтәл, дәртле абхаз халҡы бейеүе лә ҡунаҡтарҙың күңеленә хуш килде.