Полиция иҫкәртә!

Рәсәй Эске эштәр министрлығының Көйөргәҙе районы буйынса бүлегенә 47 йәшлек ир ғариза менән мөрәжәғәт итеүе тураһында Башҡортостан Республикаһы буйынса Эске эштәр министрлығының матбуғат хеҙмәте яҙа: "Фишинг һөжүме һөҙөмтәһендә мессенджер аша зыян күреүсенең банк иҫәбенән 68 мең һум аҡса урлана".

Бер көн элек ғариза биреүсегә мессенджерҙа "танышы" исеменән юл-транспорт ваҡиғаһы видеоһын ҡарау өсөн һылтанма менән хәбәр килгән: "Видеоны ҡарағыҙ, бәлки, ҡайһы бер кешеләрҙе йәки машинаны беләһегеҙҙер". Һылтанма буйынса күскәндә файл үҙенән-үҙе күсерелә башлай, һуңынан ул юҡҡа сыға. Чаттағы хәбәр ҙә юйыла.

Тиҙҙән зыян күреүсенең смартфонына банктарҙан смс-кодтар килә башлай. Банк ҡушымтаһын тикшергәндә зыян күреүсе санкцияланмаған аҡса күсереүҙе һәм рәсмиләштерелгән кредит карталарын таба.

Ир үҙенең мутлашыусыларҙың ҡорбаны булыуын аңлай һәм банктың ярҙам хеҙмәтенә карталарҙы блокировкалау өсөн мөрәжәғәт итә һәм енәйәт тураһында полицияға хәбәр итә.

Башҡортостан Республикаһы буйынса Эске эштәр министрлығы иҫкәртә: бындай ҡушымтаны күсереп алғандан һуң, мутлашыусылар телефонығыҙҙағы бар мәғлүмәткә эйә була. Уның ярҙамында белдереүҙәр һәм смс-хәбәрҙәр блокка ҡуйыла (был муттарға төрлө операцияларҙы раҫларға мөмкинлек бирә). Галереяға һәм контакттарға инеү мөмкинлеге асыла, был вирус таныштарығыҙ араһында таралыуына килтерә.

Фото: https://vk.ru/mvdporespublikebashkortostan