Ғинуар һәм февралдә ниндәй һауа торошо көтөлә?

Башҡортостанда һауа торошо ғәжәпләндереүен дауам итәсәк. Декабрь аҙағында ла һауа температураһының тирбәлеүе күҙәтелә: һыуыҡтар һәм ҡапыл йылы көндәр бер-береһен алмаштырып килә.

Ғинуар һәм февраль айҙары нимә менән ҡыуандырыр? Фобос үҙәге фаразлауынса, яңы йыл төнө ярайһы уҡ йылы буласаҡ — термометр бағанаһы яҡынса -3 градус күрһәтәсәк. 1 ғинуарҙа көндөҙ ҙә -3 градус була. Әммә  4 ғинуар ҡапыл һалҡынайтасаҡ, һауа температураһы -20 градустан түбән төшәсәк. Яңы йыл каникулдары дауамында һәм ғинуар уртаһына тиклем һыуыҡ һауа торошо һаҡланасаҡ. Әммә 16 ғинуарҙа Башҡортостанды көндәр йәнә йылына. Көндөҙ 0 градусҡаса йылыта. Бынан һуң йәнә һыуыҡ тулҡын килә һәм термометр бағанаһы төндә -21 градусҡа, көндөҙ -14 градусҡа тиклем төшә. Ғинуарҙың өсөнсө декадаһы төндә -6, -14 һәм көндөҙ -4, -10 градусҡа тиклем йылы була. Шул уҡ ваҡытта ай аҙағында һыуыҡтар кире ҡайтасаҡ. Ғинуарҙың һуңғы көндәрендә төндә -22, көндөҙ -18 градусҡа тиклем һыуыта.

 Февраль башы ла һыуыҡ буласаҡ.

Тәүге көндәрҙә һауа температураһы төндә -26, -29, көндөҙ -16, -21 градусҡа тиклем төшәсәк. Әммә һуңынан һыуыҡтар кәмей, һәм февраль өсөн ғәҙәти һауа температураһы урынлаша: төндә -13 градусҡа тиклем һәм көндөҙ -4 градус.

Хәтерегеҙгә төшөрәбеҙ, Башгидрометтан ҡыш һәм яҙ башына һауа торошо фаразына ярашлы, февралдә температура уртаса күп йыллыҡ күрһәткестәрҙән, йәғни -11,7 градустан юғарыраҡ буласаҡ.