Маладис, таксист!

89 йәшлек пенсионерға билдәһеҙ кеше шылтыратып, үҙен, туғаның, тип таныта, аварияға эләгеүен һәм ашығыс рәүештә аҡсаға мохтаж булыуын хәбәр итә. Уға ышанған әбей килгән курьерға 100 мең һум аҡсаһын тапшыра. Аҡса алғандан һуң курьер таксиға ултыра. Транспорт сараһы водителе Владислав Демочко, Башҡортостан Республикаһы буйынса Эске эштәр министрлығының эксперт-криминалистик үҙәгенең элекке хеҙмәткәре, пассажирҙың мутлашыусылар менән бәйле булыуын нисектер аңғара. Һөнәри оҫталығын ҡулланып, ул ғәйепләнеүсене яҡындағы полиция бүлегенә алып килә.

Һорау алыу ваҡытында 27 йәшлек курьер ҡылған ғәмәлен таный. Ул шулай уҡ 78 йәшлек пенсионерға ҡарата шундай уҡ енәйәт ҡылыуы тураһында һөйләй, унан да 100 мең һум аҡса урлай.

Ике факт буйынса ла РФ ЕК 159-сы статьяһы буйынса енәйәт эштәре ҡуҙғатылған. Әлеге ваҡытта ғәйепләнеүсе һаҡ аҫтында. Яҡын арала Владислав Демочко уяулығы һәм хоҡуҡ һаҡлау органдарына ярҙам күрһәткәне өсөн РФ ЭЭМ Өфө ҡалаһы буйынса идаралығына бүләкләүгә саҡырыласаҡ. Был турала РФ ЭЭМ Өфө ҡалаһы буйынса идаралығының матбуғат хеҙмәте хәбәр итә.

Фото: https://vk.com/mvdporespublikebashkortostan