Хәүефле сирле сабый тыуған

Уҙған йәкшәмбелә сирле сабыйҙы махсус борт менән Өфөнән Морозов балалар клиник дауаханаһына алып китәләр, тип хәбәр итте республиканың Һаулыҡ һаҡлау министры Айрат Рәхмәтуллин.

 Малайға тыуғас та һирәк һәм ауыр ауырыу — Гален венаһының артериовеноз малформацияһы диагнозы ҡуйыла. Бындай патология 25 мең сабыйҙың береһендә була. Мәскәүҙән һәм Санкт-Петербургтан баш мейеһенә операция яһау тәжрибәһе булған иң яҡшы белгестәр ҡатнашлығында консультациялар үткәрелә. Табиптар сабыйға хирургик интервенцияны ғүмеренең тәүге көндәрендә үткәрергә кәрәклеген асыҡлай. Юғиһә балала – ауыр өҙлөгөү йөрәк етешмәүсәнлеге һәм үпкә гипертензияһы булыуы ихтимал. Уның хәлен алдан тотороҡландыралар, шунан һуң махсус медицина модуле менән йыһазландырылған махсус бортта дауаханаға ебәрәләр.