Башҡа һыймаҫлыҡ хәл...

Туймазы район-ара тәфтиш бүлеге РФ ЭЭМ Туймазы районы буйынса бүлегенең 31 йәшлек участка полиция вәкилен әсәһе менән бергә алдан килешеп, ҙур күләмдә мутлашыуҙа ғәйепләй.

Тикшереү версияһы буйынса, ғәйепләнеүсе үҙенең ауылдашын РФ Ҡораллы Көстәрендә хеҙмәт итеүгә контракт төҙөргә күндерә, ә һуңынан, хәрби хеҙмәт өсөн алған аҡсаһын һаҡлап ҡалыу маҡсатында, уны әсәһенә фиктив кейәүгә сығырға кәрәклегенә ышандыра. Никахҡа ингәндән һуң ҡатын иренең банк иҫәбенә инә һәм улы менән бергә контрактҡа ҡул ҡуйған өсөн иренә түләнгән 2,1 миллион һумдан ашыу аҡсаны урлайҙар. Хеҙмәттән ҡайтҡан ир урлашыуҙы асыҡлай һәм Тәфтиш комитетына мөрәжәғәт итә.

Тикшереү комитеты тәфтишселәре һәм Эске эштәр министрлығының үҙ именлеге подразделениеһы оперативсыларының берлектәге эше барышында фигурант ҡулға алына.

Тәфтишсенең үтенесе буйынса суд ғәйепләнеүсегә һаҡ аҫтына алыу сараһын һайлай.

Енәйәт ҡылыуҙың бөтә шарттарын асыҡлауға, шулай уҡ дәлилдәр базаһын йыйыуға һәм нығытыуға йүнәлтелгән тейешле тикшереү эштәре үткәрелә. Әлеге ваҡытта ғәйепләнеүсенең әсәһенең ҡайҙалығын асыҡлайҙар.

Фото: асыҡ сығанаҡтарҙан.