+24 °С
Ямғыр
Яңылыҡтар таҫмаһы
23 Август 2025, 16:30
"Атайыма ялсы ғына кәрәк..."
"Икәү генә белер серҙәр бар" рубрикаһына килгән хаттан: "Ете йыл элек әсәйем мәрхүмә булып ҡалды. 63 йәштә ине. Атайыбыҙ тыуған йортта яңғыҙы тороп ҡалды. Тол ҡалғандан һуң ете йылда алты ҡатын алып айырҙы. Кеше алдында оят, инде өйләнәм, тиһә беҙ нимә тип әйтергә белмәй, аптыранабыҙ. Уның парлы булыуына ҡаршы түгелбеҙ, киреһенсә уның ҡараулы һәм иптәшле булыуы беҙгә уңайлы. Тик атайыбыҙҙың холҡона түҙеп йәшәү бик ауыр. Әсәйебеҙ дүрт балаһы хаҡына ғүмер буйы түҙеп йәшәне, шуға ла йәшләй үлгәндер тип уйлайым. Әммә яңы килгән ҡатындар уға түҙеп йәшәмәйәсәген аңламай. 70 йәште уҙһа ла, уның һаулығы шап-шаҡтай. Ғүмере буйы нәфселе булды, аҡса, мал тип йәшәне. Һаман да шулай. Ул парлы булайым, иптәшләшеп сәй эсәйем, һөйләшеп ултырайым, тип өйләнмәй. Уға 3 һыйырҙы һауып, һөтөн эш иткән, баҡса үҫтергән, 22 умартаһын ҡарашҡан, бал айыртышҡан, көнөнә өс тапҡыр төрләп-төрләп ашарға әҙерләгән ҡатын-ҡыҙ кәрәк. Тик май-ҡаймаҡ, бал, картуф һатҡан аҡсаһын бер ҙә уртаҡ итеп тотонғоһо килмәй..."
"Атайыма ялсы ғына кәрәк..."
Етмәһә йәй көнө еләк-емеш, дарыу үләндәре йыйып, миндек, һепертке эшләп һата. Яланға яңғыҙ йөрөгөһө килмәй.
60 йәште үткән ҡатын-ҡыҙҙа көн һайын был эштәрҙе башҡарырға көс тә, һаулыҡ та булырға тейеш бит. Кемеһе түҙмәй үҙе ҡайтып китә, кемеһен эшкә юҡ, тип үҙе ҡыуып ҡайтара. Эсмәгән, донъя бөтәйткән бабайға ҡыҙығыусылар күп, береһе китеүгә нисектер икенсеһе табылып тора үҙенә.
Яңғыҙ сағында беҙ ҡайтып ярҙам итәбеҙ. Бына әле лә, ҡыш өйләнгән бер ипле генә апайҙы ҡыуып ҡайтарып ебәргән. Кисә: "Бесән ташырға кейәүҙәр ҡайтһын, үҙегеҙ ҙә ҡайтһағыҙ ашарға әҙерләр инегеҙ, бер юлы бәрәңге ҡаҙырбыҙ," - тип саҡырып шылтырата.
Беҙҙең эшләп йөрөүебеҙ, ипотека түләүебеҙ уны борсомай. "Ҡыш буйы минән ташып ашайһығыҙ," - ти. Йылына бер бот ит, 3 литр бал, бер тоҡ бәрәңге биреп ебәрә. Беҙгә ауылға ҡайтып килеү өсөн генә 2 мең һум аҡса киткәнен уйламай.
Бөгөн апайҙарыма башҡаса ҡайтып ярҙам итмәйек, тип әйттем әле. Малын кәметһен, үҙен үҙе ҡараһын йә алған әбейҙәренең береһе менән йәшәһен...
Анонимно."
