+22 °С
Ямғыр
Яңылыҡтар таҫмаһы
29 Май 2025, 16:00
«Күстәнәскә ҡорот, май ал!»
«Күстәнәскә ҡорот, май ал», - тине Киткәнемдә әсәй ҡалаға. Асыҡмаҫымды ла белә, әммә Ризыҡ менән сыҡһын, ти, бала.
«Күстәнәскә ҡорот, май ал!»
«Аҙыҡлының аты арымаҫ», - тип,
Әсәй һалды майын-ҡоротон.
Юҡҡа ғына әйтмәгәндәр икән
Ауыҙ ғына һыуын ҡоротоп:
Сыҡҡан саҡта ир-ат яу юлына
Ҡуржынында алған ҡорот-май...
Тәғәйенен генә алған улар,
Ил-йорттоң да ҡотон ҡоротмай.
Ҡаҡлаған ит, ҡаҙы, ҡурҙағын да
Эремсеген, талҡан... башҡаһын,
Ауыҙынан өҙөп биргән халҡым,
Тик һау ҡайтһын ир-ат башҡайы...
Ҡунаҡ ҡайтмаҫ беҙҙән күстәнәсһеҙ...
Мин дә алам майын-ҡоротон.
«Туғандарым! Рәхмәт инде!» – тимен,
Ауыҙғынам һыуын ҡоротоп...
Ҡәҙим АРАЛБАЙ
