"Улар бер кемде лә үлтермәй, ғәрипләмәй..."

Республикала 11 кеше мутлашыусыларға 5 миллион һумдан ашыу аҡса биргән.

Өфө ҡалаһында йәшәүсе 48 йәшлек ҡатынға "менеджер" шылтырата. Шылтыратыусы эш урынында тикшереү алып барылыуы хаҡында белдерә һәм тиҙҙән хоҡуҡ һаҡлау органдары хеҙмәткәрҙәренең шылтыратыуҙары хаҡында иҫкәртә. Шәхси мәғлүмәттәрҙең ситкә китеүенә юл ҡуймау маҡсатында ҡатын, "ФСБ хеҙмәткәрҙәренең” күрһәтмәһен үтәп, мутлашыусыларҙың иҫәбенә 1,5 миллион һумдан ашыу аҡса күсерә.

Благовещен районында йәшәгән 44 йәшлек ҡатынға “энергосбыт хеҙмәткәре” шылтырата. Шылтыратыусы, электр счетчигын алмаштырыу өсөн сиратҡа яҙылыу һылтауы менән, ҡатынды смс-кодты әйтергә күндергән. Бынан һуң, йәнәһе, хоҡуҡ һаҡлау органдары хеҙмәткәрҙәренән һәм банктан шылтыратыуҙар килгән. "Белгестәр" уның исеменә кредит алыу өсөн билдәһеҙ кешеләрҙең ғариза бирергә тырышыуы тураһында хәбәр итә һәм ғаризаны юҡҡа сығарыу өсөн "ҡаршы кредит" алырға ҡуша. Ауыл ҡатыны енәйәтселәрҙең күрһәтмәһен үтәй һәм, кредит алып, уларҙың иҫәбенә 1 миллион һум аҡса күсерә.

Башҡортостан Республикаһы буйынса Эске эштәр министрлығы иҫкәртә: уяу булығыҙ. Аҡсағыҙҙы "хәүефһеҙ иҫәп"кә күсермәгеҙ, сит кешеләргә телефон аша шәхси мәғлүмәттәрегеҙҙе, смс-кодтарҙы, банк реквизиттарын бирмәгеҙ. Иҫегеҙҙә тотоғоҙ, муттар үҙҙәрен теләһә кем итеп күрһәтә ала!

Фото: асыҡ сығанаҡтарҙан.