Ҡартаябыҙ тей ҙә уфтаналар...

Күпме тиҫтерҙәрем ирекһеҙҙән

Иртә китте яҡты донъянан.

Рәхмәт, Раббым, оҙон ғүмер бирҙең,

Бәрәкәте менән ҡушарлап,

Әрәм-шәрәм итмәнем дә былай,

Тик бәхетте бирҙең тотҡарлап.

Һуңлап килгән бәхет ҡәҙерле тип

Әйтер ине борон ололар.

Бәхетлемен! Һыҙлап киткәндә лә

Ташҡа бәргән башта оролар.

Йәш саҡта бит көс-ҡөҙрәт тә етә

Үткәрергә яҡшы-яманын,

Олоғайғас оло һынауҙарҙы

Күтәрергә бер үк яҙмаһын.

Ҡартаям тип бер ҙә уфтанмайым,

Бошонорға һис юҡ әмәлем,

Ер һелкетеп баҫып булмаһа ла,

Күңелемә бик хуш үҙ мәлем.

Мәүҙиға Баймөхәмәтова.

Фотола — автор.