"Бар хәлебеҙсә ярҙам итәбеҙ"

Махсус хәрби операцияла  ҡатнашыусыларға һәм уларҙың ғаиләләренә ярҙам йылы сиктәрендә Бөрйән районының Нәби мәктәбе, мәҙәниәт хеҙмәткәрҙәре һәм ауылдың әүҙем, битараф булмаған ҡатын-ҡыҙҙары Гөлдәр Вәлиева, Асия Хисаметдинова, Гөлфинә, Ғәрифә Һатыбаловалар, Наилә Әхмәтова, Фәилә Сәлтәшева, Әлмира, Гөлсинә, Әминә Ибатуллиналар “Үҙебеҙҙекеләрҙе ташламайбыҙ” акцияһына ҡушылған.

Һәр кем өйөнән бешеренеү кәрәк-яраҡтары алып килеп, мәктәп ашханаһында борщ бешереп консервалағандар. Сәксәкте Асия Хисаметдиноваларҙың өйөндә газ плитәһендә бешереп әҙерләгәндәр.

МХО-ға ярҙамды Нәби ауылы ветерандар советы менән берлектә быға тиклем дә маскировка селәтәрҙәре үреп тапшырыу булһынмы, ойоҡ-бейәләйҙәр бәйләп, йыуыныу кәрәк-яраҡтары йыйып тапшырыу булһынмы, нәбиҙәр гуманитар ярҙам йыйыуҙа  һәр саҡ әүҙем ҡатнаша.

- Яугирҙарыбыҙ иҫән-һау йөрөп ҡайтһындар, илебеҙгә тиҙерәк тыныслыҡ килһен өсөн бар хәлебеҙсә тырышабыҙ, – ти, ауылдың ветерандар советы рәйесе Хәмдиә апай Һатыбалова.

Сығанаҡ: "Таң" гәзите.