Йәшел дарыухана: Этҡолаҡ (окопник)

  Борон уның тамырын сусҡа майына ҡушып, һынған, ауыртҡан, тартылған урындарҙы ыуғандар. Хатта эренләп ялҡынған һөйәктәр ҙә уның менән дауаланғандан һуң тиҙерәк йүнәлгән. Бер үк ваҡытта уның төнәтмәһен дә эскәндәр.  Балаларҙы иһә һөйәктәре ныҡ булһын өсөн, һыуында йыуындырғандар. Этҡолаҡ бактерияларға һәм ялҡынһыныуға ҡаршы тороу көсөнә эйә. Уны өҫкө тын юлдары ауырыуҙарынан киң ҡулланалар.

Был дарыу үләне һәр һөйәк ауырыуынан ҡулланырға мөмкин.  Мәҫәлән, һөттәге төнәтмәһенә бал һәм сей йомортҡа ҡушып, һөйәк туберкулезын дауалайҙар.  Ул эренле һөйәк ялҡынһыныуынан да ярҙам итә, хатта бот муйынтығы некрозынан да файҙаһы тейә. Тамырын ай тулған төндә генә ҡаҙып алырға кәңәш итәләр. Йыуырға ярамай. Бер һелкеп алғандан һуң, күгәртмәй генә киптерергә. Дауалау өсөн уны ҡаҙып алғас та йәки киптереп файҙаланалар.

Этҡолаҡ төнәтмәһе

• Компресс йәки япма өсөн ике ҡалаҡ киптерелгән тамырға бер стакан ҡайнар һыу ҡойойп, төнгөлөккә термоста төнәтергә. Йәки һүндерелгән йылы мейескә ҡуйырға мөмкин.  Иртәнсәк иһә әҙер төнәтмәне һөҙөп алырға.
• Эсеү өсөн һыуғҙа төнәтергә мөмкин. Бының өсөн бер ҡалаҡ тамырға 200 мл ҡайнар һыу ҡойоп, бер төн төнәтергә һәм һөҙөп алырға. Шул уҡ тамырға тағы 200 мл ҡайнар һыу ҡойойп, ярты сәғәт төнәтергә һәм төнәтмәһен һөҙөргә. Һуңынан  барыһын бергә ҡушып, ике сәғәт һайын икешәр ҡалаҡ эсергә.
• Бынан тыш, ошо төнәтмә менән көнөнә ике тапҡыр тәнде ыуырға. Дауаланыу курсы – бер – ике  ай.
• Спиртлы төнтәмәне 1:5 нисбәтендә әҙерләйҙәр. Мәҫәлән, 50 г этҡолаҡ тамырына 250 мл араҡы ҡушып,  бер аҙна ҡараңғы урында төнәтергә. Әҙер төнәтмәне көнөнә биш тапҡыр 50 мл һыуға 20 –40 тамсы тамыҙып эсәләр.  Бер үк ваҡытта ауыртҡан урындарҙы ыуырға ярай.

Майы

 Таҙартылған һәм ваҡланған этҡолаҡ тамырын ит үткәргестә үткәреп, сусҡаның эске майын ҡушып бутарға.  Был май менән ауыртҡан урындарҙы ыуалар. Шулай уҡ компресс итеп ябырға мөмкин.  Ул оҙаҡ һаҡланмай, шунлыҡтан әҙләп кенә эшләргә кәңәш ителә.