Оло кешене торлаҡһыҙ ҡалдырған муттар

Рәсәй Эске эштәр министрлығының Стәрлетамаҡ ҡалаһы буйынса идаралығының дежур часына 70 йәшлек ҡатын мөрәжәғәт итә. Ул хәбәр итеүенсә, август башында уҡ уға билдәһеҙ ирҙән шылтыратыу килә, ул үҙен банктың хәүефһеҙлек хеҙмәте хеҙмәткәре тип таныштыра. Ул, мутлашыусылар уның фатирын һатҡан, аҡсаны кире ҡайтарыу өсөн ҡаланың күсемһеҙ милек агентлыҡтарының береһендә һатып алыу-һатыу килешеүе төҙөргә кәрәк, тип аңлата. Ҡурҡҡан ҡатын шул агентлыҡҡа мөрәжәғәт итә, октябрҙә һатып алыусы табыла һәм 4 миллион 550 мең һумға һатыу-һатып алыу килешеүе төҙөлә. Пенсионер аҡсаһын алғандан һуң, уға "банк менеджеры" шылтыратып, аҡсаны инкассаторға тапшырырға кәрәклеген әйтә. Билдәләнгән ваҡытта зыян күреүсе ихатаға сыға һәм бөтә сумма менән пакетты билдәһеҙ иргә тапшыра. Был ваҡиғанан һуң, уға бер кемгә лә был хаҡта һөйләмәү талабы менән янауҙар килә башлай. Тик ноябрҙә фатирҙан күсеп сығырға ваҡыт еткәс кенә, ҡатын бөтәһен дә ҡыҙына һөйләп бирә, ул шунда уҡ әсәһенең мутлашыусыларҙың ҡорбаны булыуын аңлай.

Рәсәй Эске эштәр министрлығының Стәрлетамаҡ ҡалаһы буйынса тәфтиш идаралығы мутлашыу факты буйынса енәйәт эшен ҡуҙғатҡан.

- Хөрмәтле граждандар! Ата-әсәгеҙгә һәм оло йәштәге яҡындарығыҙға мутлыҡтар тураһында һөйләгеҙ. Финанс операцияларын яттарҙың үтенесе буйынса башҡарырға, таныш булмаған кешеләргә аҡса тапшырырға ярамағанын аңлатығыҙ. Ундай осраҡтарҙа мотлаҡ яҡын кешеләр менән кәңәшләшергә кәрәк! - тип иҫкәртеп, ошо хаҡта Рәсәй Эске эштәр министрлығының Стәрлетамаҡ ҡалаһы буйынса идаралығынан Лилиә Исламғолова яҙа. 

Фото: https://vk.com/mvdporespublikebashkortostan