Йәштәр йылына йомғаҡ яһалды

"Рух майҙаны" комплекслы күсмә саралар ойошторолдо. Башҡорт телен үҫтереү һәм һаҡлау ойошмаһы тематик квиз-уйындар уҙғарҙы. Шулай уҡ "Рух" башҡорт йыры фестивале иғлан ителде.

Бөгөн Өфөләге "Атайсал" мәҙәниәт йортонда маҡсатлы йылға йомғаҡ яһалды. Район һәм ҡалалар делегациялары батырҙар темаһына квиз-уйында ҡатнашты һәм стратегик сессияла эшләне.

Бөтә донъя башҡорттары ҡоролтайының башҡарма комитеты рәйесе Юлдаш Йосопов белдереүенсә, әүҙем йәштәр тәҡдим иткән проекттар, идеялар декабрҙә үтәсәк ҙур йыйында йәштәр секцияһында ҡараласаҡ.

Белеүегеҙсә, алтынсы Бөтә донъя башҡорттары ҡоролтайы 13 декабргә күҙалланған.

Әлеге йомғаҡлау сараһында бик күп Маҡтау ҡағыҙы, Рәхмәт хаты тапшырылды, йыл буйына әүҙем эшләгән район һәм ҡалалар баһаланды.

"Рух" йыр фестиваленең геогрфияһы киң булған - ҡатнашыусылар беҙҙең республиканан ғына түгел, күрше төбәктәрҙән дә, Мәскәүҙән дә, Ҡурған өлкәһенән дә булды.

Сарала халыҡ-ара гүзәллек конкурстарында халҡыбыҙ данын яҡлаған, исемдәр яулаған һылыуҡайҙар ҙа бүләкләнде.

Фото: Юлай Кәримов фотолары.