Афарин, Булат!

Төнгө дежурлыҡ ваҡытында РФ ЭЭМ Стәрлетамаҡ ҡалаһы буйынса идаралығының эксперт-криминалистик үҙәге бүлексәһе хеҙмәткәре полиция өлкән лейтенанты Булат Ғәзизов урамға сығып, бина эргәһендәге биләмәне тикшерә. Ошо ваҡытта полиция хеҙмәткәре янына тулҡынланған егет килеп, аллеяла бер ирҙең ерҙә ятыуы тураһында хәбәр итә.

Полиция хеҙмәткәре шунда уҡ аллеяға йүгерә. Ерҙә ятҡан ир, йөрәгем ауырта, тип әйтә лә, аңын юя. Булат Ғәзизов был хәл тураһында кисекмәҫтән дежур бүлеккә хәбәр итә, ашығыс медицина ярҙамы саҡырыуҙы һорай һәм шунда уҡ ирҙе арҡаһына әйләндереп һалып, курткаһын сисә лә, реанимацияны башлай.

Өс цикл яһалма тын алыу һәм күкрәгенә баҫҡандан һуң, ир үҙ аллы тын ала башлай. Ашығыс ярҙам бригадаһы килгәнгә тиклем полиция хеҙмәткәре һәм Стәрлетамаҡта йәшәүсе Михаил Стукалов уның янында була.

Ир тейешле дауалау ала һәм хәҙер үҙен яҡшы тоя. Ул үҙенең ҡотҡарыусыларына сикһеҙ рәхмәтле.

Булат Ғәзизов, бер ниндәй ҙә ҙур эш ҡылманым, тип иҫәпләй. Уның һүҙҙәренсә, һәр хоҡуҡ һаҡлау органдары хеҙмәткәре кәрәк ваҡытта беренсе медицина ярҙамы күрһәтә белергә тейеш.

Афарин, Булат!

Фото: UTV телеграм каналынан.