Ауырғазы районының талантлы уҡытыусыһы Зөлфиә Ғәзиева ижады

Зөлфиә ҒӘЗИЕВА 1963 йылдың 7 ғинуарында Ҡорманай ауылында тыуған. Башҡорт дәүләт университетының филология факультетын тамамлап, Кшәнле ауылында татар теле һәм әҙәбиәте уҡытыусыһы булып эшләй.

1 сентябрь иртәһе

Тулҡынланыу аша мин был көндө

Һағынып та көтөп аламын.

Әйтерһең дә үҙем тәүге тапҡыр

Мәктәпкә уҡырға барамын.

Ята- тора, түҙемһеҙлек менән

Ҡаршылайым иртә таңымды.

Япраҡ, алма еҫе, наҙлы елем

Хәтерләтә сабый сағымды.

Күңелемдә “Әлифба” китабы –

Һәр битен ҡәҙерләп асамын.

Белем асҡыстарын ҡыҫып тотоп,

Мәғрифәт юлына баҫамын.

Йылдар үтте. Тупланған белемде

Киләсәк быуынға өләштем.

Дан, дәрәжә өсөн эшләмәнем,

Йөҙ аҡлығы өсөн көрәштем.

...Ә ҡаршымда – аҡ таҫмалы ҡыҙсыҡ...

Баласағым, зинһар, китмәсе!..

Уҡытыусы... Бөйөк, изге һөнәр.

Беренсе сентябрь иртәһе...