+24 °С
Ямғыр
Яңылыҡтар таҫмаһы
21 Август 2024, 11:01
Өфөлә автомобиль менән мутлашыуҙа ғәйепләнгән ҡатынға хөкөм ҡарары сығарылды
Судта билдәләүҙәренсә, 2021 йылда ҡатын үҙенең танышы менән берлектә "УБЕРТРАНСЛОГИСТИК" яуаплылығы сикләнгән йәмғиәтен ойоштора, уның төп эшмәкәрлеге автомобиль арендаһы һәм лизингы була. Шул уҡ йылдың август һәм сентябрь айҙарында ул өс ҡатынды таба, уларға кредитҡа автомобилдәр алып, уларҙы үҙҙәренең фирмаһы аша ҡуртымға бирергә тәҡдим итә. Ул дивидендтар түләргә һәм кредит түләүҙәрен үҙ аллы башҡарырға вәғәҙә итә.
Өфөлә автомобиль менән мутлашыуҙа ғәйепләнгән ҡатынға хөкөм ҡарары сығарылды
Алданған ҡатындар кредит алып, "Audi A6", "Toyota Camry", "Hyundai i40", "Kia Rio" маркалы биш сит ил автомобиле һатып ала һәм уларҙы документтар, асҡыстар менән бергә енәйәтсегә тапшыра.
Тәүге бер нисә айҙа ғәйепләнеүсе үҙ йөкләмәләрен үтәй, ә һуңынан машиналарҙы башҡа кешеләргә һатып ебәрә. Хоҡуҡҡа ҡаршы ғәмәлдәр һөҙөмтәһендә зыян күреүселәргә дөйөм суммаһы 5,7 миллион һумдан ашыу зыян килтерелгән. Хөкөм ителеүсе енәйәт ҡылыуҙа ғәйепле булыуын таный. Суд уға дөйөм режимлы холоҡ төҙәтеү колонияһында 4 йыл иркенән мәхрүм итеү, шулай уҡ зыян суммаһын түләтеү рәүешендә яза тәғәйенләй. Хөкөм ҡарары әле закон көсөнә инмәгән. Был турала БР Прокуратураһының матбуғат хеҙмәте хәбәр итә.
Фото: асыҡ сығанаҡтарҙан.
