Стәрлетамаҡ ҡалаһының талантлы уҡытыусыһы Зөһрә Үтәғолова ижадынан бер шәлкем

Зөһрә ҮТӘҒОЛОВА 1961 йылдың 15 авгусында Бөрйән районының Аҫҡар ауылында тыуған. Стәрлетамаҡ дәүләт педагогия институтының филология факультетын тамамлағас тыуған яҡтарына эшкә ҡайта. Бөгөнгө көндә Стәрлетамаҡ ҡалаһының Ленин исемендәге интернат-лицейында эшләй. “Илһам шишмәләре”конкурсы лауреаты, “Иң яҡшы башҡорт теле уҡытыусыһы” гранты еңеүсеһе. Дүрт китап авторы, Яҙыусылар союзы ағзаһы.

Нисек кенә сыҙармын?
Тағы дәрестәргә әйҙәй
Ҡыңғырау тауыштары.
Шул ҡыңғырау эстәрендә –
Ғүмерем ағыштары.
Саң һуҡҡандай ҡыңғырауҙар:
Һанаулы ғүмер юлы.
Йөрәктәрҙе сүкегәндәй,
Бәүелеп уңлы-һуллы.
Юҡ, ҡыңғырау, ашыҡмайым,
Дәрт уята сыңдарың.
Һинең көйгә тағы тыуҙы
Тулғаҡлаған йырҙарым.
Ҡабатланмаҫ һәр сыңыңды
Күңел биреп тыңлармын.
Ҡыңғырауһыҙ донъяларҙа
Нисек кенә сыҙармын?!

Йәнле мунсаҡ
Тере мунсаҡ, тере мунсаҡ,
Тере мунсаҡ эленде.
Сырҡылдашып-сырҡылдашып
Сымдар буйлап теҙелде.
Бәүелделәр, бәүелделәр,
Яңы көйҙәр оттолар.
Өҙөлдө лә китте мунсаҡ —
Шуҡ турғайҙар остолар.
Отҡор бесәйем
Отҡор ғына бесәйем,
Үҙе шундай һөнәрмән.
Әсәйемдәй, икмәк баҫа —
Ҡарап тороп өйрәнгән.

Хәҙерге өләсәйҙәр
(Шаярыу)
Заман менән үҙгәрҙе
Хәҙерге өләсәйҙәр.
Интернетҡа инергә
Яйын ғына эҙләйҙәр.
Башҡарыла ҡайсаҡ һуң
Башланған эштәре лә.
Ваҡыттар бит урлана
Сәхифә эстәрендә.
Интернет-өләсәйҙән
Күҙ яҙлыҡтыра тәнәй.
Әллә ниңә өләсәй
Әкиәт бик һөйләмәй...
Кемдә ғәйеп икән, тип
Эҙләмә һин, күрмә лә.
Өләсәйҙән оҫтараҡ
Ейән менән ейәнсәр
Компьютер төймәһенә
Баҫа күрше бүлмәлә!..