+22 °С
Ямғыр
Яңылыҡтар таҫмаһы
5 Август 2024, 18:00
Баҡалы районының талантлы уҡытыусыһы Гөлнур Трофимова ижады
"Изге һөнәрле ижадсы" проекты тәҡдим итә:
Баҡалы районының талантлы уҡытыусыһы Гөлнур Трофимова ижады
Гөлнур ТРОФИМОВА 1977 йылдың 25 февралендә Ҡамай ауылында тыуған. Бөрө дәүләт педагогия институтын тамамлай. Әлеге ваҡытта Иҫке Әзмей мәктәбендә башҡорт теле һәм әҙәбиәте уҡытыусыһы булып эшләй. “Йыл уҡытыусыһы – 2022” конкурсы еңеүсеһе.
Тыуған ерем
Болононда –
Ҡанаттарын елпеп-елпеп
Уйнап оса күбәләктәр.
Күбәләктәргә ҡыуанып
Тирбәлә гөл-сәскәләр.
Урманында
Көнө буйы бер туҡтамай
Һайрап тора ҡоштары.
Әкрен иҫкән талғын елдә
Шаулаша ағастары.
Күк йөҙөндә –
Һәр көндө бөтә йыһанға
Нурын һибеп ҡояш көлә.
Төндәрендә йондоҙҙарҙы
Ҡоса-ҡоса ай йөҙә.
Шишмәһендә –
Татлы һыуы бер туҡтамай
Селтер-селтер ағып тора.
Барса халыҡ һыуын эсеп
Йән-тәненә шифа ала.
Ошоларҙың барһын бергә
Йыя бит тыуған ерем.
Тыуған ерем, Тыуған илем –
Һин минең берҙән-берем.
Яҙ
Көтөп алған яҙҙар килә
Бар йыһанды уятып.
Йылы яҡтан ҡоштар ҡайта
Тыуған яғын һағынып.
Шаулап аға гөрләүектәр,
Ләйсән ямғырҙар яуа.
Ярҙарына һыя алмай
Йылғала боҙҙар аға.
Яҙғы көндәр йылытҡас та
Ҡар аҫтынан баш ҡалҡыта -
Тирә-яҡты йәмгә күмеп,
Умырзаялар сыға.
Яратам йәмле яҙҙарҙы -
Бар тәбиғәт уяна.
Ҡышҡы тәрән йоҡонан һуң
Яңы тормош башлана.
